Allen^a) den, die disen brief ansehent lesent oder ho^erent lesen, kúnden wir die nâchgenemten Bernhart Vo^eli von sant || Gallen burger ze V´berlingen¹ vnd Hugo Vo^eli sin êlicher sun vnd veriehen offenlich mit disem brieue fúr v´ns || fúr Johansen vnd fúr Bernharten min dez obgenanten Bernhartz êlichen sûn, die zv^o iren tagen noch niht komen || sint, vnd fúr alle v´nser erben, daz wir mit gůter vorbetrahtung vnd mit ainberem willen diz nâchgeschriben gůt vnd gelt, daz gůt, daz man nemmet die Nider Hůb², gelegen ze Geriswille³ mit akkern mit wisen mit wasen mit zwi mit holtz mit veld mit wunn mit waiden mit stok mit stain mit allen rehten nútzzen vnd gewonhaiten vnd mit allem dem, daz wir ze Geriswille gehept habent vntz her vff disen húttigen tag, alz dirre brief geben ist, ez sie genemptz oder vngenemptz gesůchtz oder vngesůchtz wissentz oder vnwissentz, vnd von den vnd vsser den gu^etern ze Hetzzenwille⁴ vier schilling vnd aht phenning gůter vnd gena^emer Costentzzer múnse vnd vier herbst hu^enr ja^erliches geltes redlich vnd reht verko^vft vnd ze ko^vffenn geben habent dem erbern vnd wolbeschaidenn V^olrich dem Vorster von Gosso^vw⁵ burger ze sant Gallen vnd sinen erben, ob er enwa^er, vmb vierzig phunt vnd vmb drú phunt phenning gůter vnd gena^emer Costentzzer múnse, der wir gantzlich von im gewert sient vnd enphangen habent vnd an v´nsern offenn nutz bewendet, daz selb vorgeschriben gůt vnd gelt v´nser reht friies aigen waz, vnd habent im o^vch daz selb gůt vnd gelt mit allen rehten vnd mit aller zv^o geho^erde offenlich an dez richs strasse fúr ain reht friies aigen reht vnd redlich geuertgot vnd zv^o sinen handen braht, alz reht sitte vnd gewonlich waz vnd alz ez kraft vnd maht sol vnd mag han. Vnd darumb so habent wir v´ns willeklich verzigen vnd verzihent v´ns mit disem brieue gantzlich vnd gar fúr v´ns vnd fúr alle v´nser erben dez vorgeschribenen gůtes vnd geltes mit aller zv^o geho^erde aller aigenschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so wir vnd v´nser erben an dem zv^o dem vnd von dez vorgeschribenen gůtes vnd geltes wegen ie gehept habent ald hie nach iemer gehaben oder gewinnen mo^ehtint, vnd daz wir noch v´nser erben noch nieman andre an v´nser stat noch von vnsern wegen den vorgenemten V^olrich Vorster noch dehain sin erben noch nachkomen von dez vorgeschribenen gůtes noch geltes wegen niemer súllent noch wellent ansprechen vf triben bekúmberren bekrenken noch in kain wis beswa^eren weder mit gaistlichem noch mit weltlichem geriht noch ân reht noch mit enkainer lay ander sache ân alle geua^erde. Wir habent o^vch gelobt mit v´nseren trúwen vnd lobent mit disem brieue fúr v´ns vnd alle v´nser erben, dez vorgeschribenen gůtes vnd geltes mit aller zv^o geho^erde vnd dez ko^vffes reht wer ze sinne nach dez landes reht vnd o^vch den vorgenemten V^olrich Vorster vnd sin erben darumb ze versprechenn vnd ze versta^enne an allen stetten gen den vorgenemten kinden Johansen vnd Bernharten, die zv^o iren tagen noch niht komen sint, vnd gen aller ma^englichem ân allen iren schaden, wenn wâ vnd wie dik sú darumb an gesprochen geschadgot oder vf getriben werdent mit dem rehten, vnd wenn o^vch die vorgenemten kint Johans vnd Bernhart zv^o iren tagen koment, daz wir danne ân allen fúrzug fu^egen vnd schaffen súllent, daz dú selben kint dem vorgenanten V^olrich Vorster oder sinen erben, ob er enwa^er, daz vorgeschriben gůt vnd gelt vf gebent vnd zv^o iren handen vertgent, alz dann reht sitte vnd gewonlich ist vnd alz o^vch wir ietz getân habent. Vnd ze vrkúnd der wârhait aller der vorgeschribenen dinge vnd vergiht so habent wir die vorgenemten Bernhart Vo^eli vnd Hugo sin sun fúr v´ns vnd fúr alle v´nser erben v´nserú insigel gehenkt an disen brief. Der geben ist ze V´berlingen an dem na^ehsten ma^entag nâch sant Pelaiien tag in dem jâr, do von Cristus gebúrt warent drúzehenhundert jâr, sibenzig jâr vnd darnach in dem sibenden jâre.

Source Fulltext: Chartularium Sangallense IX, Nr. 5609, S. 282-283.