Allen den, die disen brief ansehent lesent oder ho^erent lesen, kúnd ich Hug der Artzat vnd vergich des offenlich mit disem || brief fúr mich vnd fúr alle min erben, das ich tugentlich verricht bin mit allem lieb mit dem spital ze sant Gallen¹ vnd || o^vch mit sinen phlegern von aller der ansprach wegen, so ich hatt ald gehaben mo^eht ald min erben von minen wegen || von des lipdinges wegen miner swo^ester Annun sa^eligen der Artzotinun vnd och des schaden, so ich gehebt han von der ansprach wegen, vnd han von innen enphangen von des lipdinges wegen drúzehen phunt vnd drizehen schilling phenning gůter vnd gena^emer Costentzer múnse, vnd och von des schaden wegen, so ich gehebt han von des lipdinges wegen, han ich och von innen enphangen zehen guldin, des geltz ich och gantzlich gewert bin, vnd han och innen gelobt mit minen trúwen, wa^er das ieman den vorgedahten spital ald sin phleger iemer me vff tribi ald anspra^ech mit dem rechten von der ansprach, so ich gehebt han von des lipdinges wegen, wie dike das bescha^ehe mit dem rehten, das ich denn den vorgedahten spital vnd sin phleger verstan vnd versprechen sol nach dem rechten an allen stetten, wa si denn sin notdúrftig sint, an allen iro schaden. Wa^er aber, dz der spital ald sin phleger dehainist angesprochen wurdint nach dem rechten, wie si des ze schaden koment mit dem rechten, wie sich das fůgti, von dem schaden sol ich der obgenant Hug Artzat sú gantzlich vnd gar vnschadhaft machen. Wa^er o^vch, das ich Hug der Artzat den spital noch sin phleger nit verstu^end, als ich gelobt han nach dem rechten, so hat der vorgedaht spital vnd sin phleger vollen gewalt vnd friges vrlob, mich an ze griffenn mit gaistlichem vnd mit weltlichem gericht an allen stetten, wa si mich denn ergriffen mugent. Vnd des alles ze ainem waren vrkúnde vnd gantzer sicherhait der vorgeschribenn richtung vnd gedinge so han ich der obgenant Hug Artzat min insigel gehenkt an disen brief. Der geben ist ze sant Gallen am na^ehsten fritag vor sant Jacobs tag des zwelfbotten, do man zalt von Cristus gebúrt drúzehenhundert jar vnd dar nach in dem sibentzgosten jar.

Source Fulltext: Chartularium Sangallense VIII, Nr. 5233, S. 420-421.