Wir^a) diz nâchgenempten Bartholome Blârer, V^olrich Ru^edger phleger vnd maister der siechen dez spittâls ze sant Gallen¹, V^olrich Ko^echler dez selben spittâls vnd o^vch der armen siechlin || phleger am Linsibu^el ze sant Gallen² vor der statt ringmûr gelegen, V^olrich Spiesser vnd Johans Appaceller o^vch der ietzgenempten siechlin phleger vnd maister am Linsibu^el tu^egint || kûnt vnd veriehent offenlich mit disem brieue fúr vns vnd fúr alle vnser nâchkomen allen, die in sehent lesent oder ho^erent lesen, daz wir alle ainmu^eteklich mit gůter vorbetrach||tûnge vnd mit wolbedachtem můte den êrbern wolbeschaidenn lúten Hainrichen, Cůnraten vnd Johansen vff dem Berg³ gebrůdern Friken sa^eligen vff dem Berg wilent elichen su^en vnd Ma^ehthilten iro êlicher swo^ester allen gemainlich diz nâchgeschriben gůte, daz man nemmet vff dem Berg vnd ainhalb stosset an daz vorder Sturtzenêgg⁴, andert an daz hinder Sturtzenêgg vnd ze der dritten syten an Wittretswendiner gůt, daz man nemmet der So^vm⁵, vnd der vorgenempten siechen dez egedachten spittâls vnd o^vch dez Linsibu^els gemain rechtz aigen ist, mit grûnd mit grât mit zimberren mit holtz mit veld mit akkern mit wisen mit wûnn mit waiden mit wasen mit zwi mit stegen mit wegen mit gengen mit strâssen mit allen rechten nútzzen vnd gewonhaiten vnd mit allen zůgeho^erden recht vnd rêdlich verlihen habent inen vnd allen irn êrben frowen alz mannen tochtern alz knaben ze ainem sta^eten êrbzinslehen vmb ainen sta^eten zins mit samlicher beschaidenhait vnd in den rechten dinge vnd gedinge, daz sú vnd alle iro êrben daz vorgenant gůte mit aller zůgeho^erde in eren vnd vnwůstlich haben niessen bûwen besêtzen vnd entsêtzen sont, vnd súllent dem selben vorgedachten spittâl da von aller ja^erlich ie ze sant Martins tag ain malter vesan vnd ain malter haber gůtes vnd vngefârlichs kornes sant Galler messes zehen schilling phenning Costenzer múnse fúnf hu^enr vnd fúnfzig aiger vnd den egenempten siechlin am Linsibu^el o^vch ain malter vesan ain malter haber dez vorgeschribenn messes vnd werûnge zehen schilling phenning der egedâchten múnse fúnf hu^enr vnd fúnfzig aiger ze rechtem ja^erlichen zins ân fúrzug ân allen abgang vnd ân alle minrûnge geben richten vnd antwúrten ze sant Gallen in baidú húser, alz dâ vor beschaiden ist, in ieweder hus besûnder, alz vil dâr in geho^ert, alz da vor geschriben stat vnd mit worten beschaiden ist, vnd habent o^vch baiden den vorgeschribenn húsern von den obgenanten Hainrichen, Cůnraten vnd Johansen vff dem Berge gebrůdern vnd von Ma^ehthilten iro swo^ester dâr vmb ze rechtem êrschatz enphangen vnd genomen zwainzig phûnt phenning gůter vnd gena^emer Costenzer múnse, die an der vorgeschribenn zwaiger húser offenn nûtz bewendet sint worden. Welhes jâres aber die obgenanten Hainrich, Cůnrat, Johans vnd Ma^ehthilt vff dem Berg geswústrit den vorgedâchten zins nút richtint vnd ga^ebint gantzlich vnd gar ze den ziln vnd in den rechten, alz vor geschriben stât vnd mit worten beschaiden ist, vnd sich daz alz vil vnd alz lang verzug, daz zwen zins den dritten erlangitint vnd begriffint, wenn denn daz beschiht, daz zwen zins den dritten erlanget vnd begriffen hant, so ist vnd sol daz vorgeschriben gůte, daz man nemmet vff dem Berg, mit aller zůgeho^erde dem vorgedâchten spittâl vnd o^vch den siechlin am Linsibu^el zinsfellig vnd gantzlich vnd ledig vnd los sin vnd haissen vnd dannenhin iemer mêr êweklich von aller ma^englichem vnanspra^echig sin vnd beliben ân aller ma^englichs hindernûsse vnd widerrêd ân alle gefa^erde. Ez wart o^vch bedingot vnd beredt, wâre daz die obgenanten Hainrich, Cůnrat, Johans vnd Ma^ehthilt vff dem Berg oder dehaines vnder inen ald iro êrben daz vorgeschriben gůte alz wůstlich hettint in dehain wise, daz der vorgeschribenn húser phleger ald iro botten, die sú vs schiktint, dûnkti, so sú ez besehent, daz die egenempten bûwlúte daz selb vorgedâcht gůte anders gehalten vnd gehebt hettint denn sú so^eltint, so so^eltint die selben phleger oder botten drij êrber man dez selben gůtes na^ehsten nâchgebûrn dârzů nemen vnd kiesen, vnd o^vch die egenempten bûwlúte súllent och drij êrber man o^vch der na^ehsten nâchgebûrn dez selben gůtes dârzů nemen, wa^er aber daz die selben sechs man nút ain mêrers vnder inen gemachen mo^echtint die selben sache ze entschaiden, daz denn die selben sechs man noch ain man zů inen nemen vnd kiesen súllent vnd mûgent, welhen sú wo^ellent, vnd súllent denn die selben siben oder sechs man daz vorgeschriben gůt besehen, vnd wa^ere daz die selben sechs oder siben man oder der mêrer tail vnder inen sich dez erkaindint, daz die egenempten buwlút daz vorgeschriben gůte in samlichen êren gehebt hettint, dâz sú dâr vmb vnstra^vffber wa^erint, dez so^eltint sú geniessen, wa^er aber, daz sich die selben sechs ald siben man oder der mêrer tail vnder inen sich dez erkandint, daz die obgenanten buwlúte daz egedâcht gůte alz wůstlich vnd in samlichen êren nút gehebt hêttint, denn daz sú dâr vmb wol strâffba^er vnd ze strâffenn wa^erint, dez so^eltint sú engelten vnd so^eltint daz o^vch bêssren vnuerzogenlich nâch erkantnûsse vnd nâch haissen der selben sechs ald siben mannen oder dez mêrern tails vnder inen. Ez wart o^vch bedingot vnd berêdt, wa^ere daz die obgenanten Hainrich, Cůnrat, Johans vnd Ma^ehthilt vff dem Berg oder iro êrben dehaines jâres von iro rechten dez vorgedâchten gůtes vnd êrbzinslêhens gân vnd die verko^vffen wo^eltint, so súllen sú der vorgenempten siechen dez spittâls vnd dez Linsibu^els phlegern, wer die sint, die selben irú recht dez êrsten vail bieten vnd vor ma^englichem ze ko^vffenn geben fúnf schilling phenning Costenzer múnse na^eher vnd bas denn iemant andre, ob sú sie ko^vffen wo^ellent, wa^er aber, daz sú sie nút ko^effen wo^eltint ald mo^echtint, so mûgent sú dannenhin die selben irú recht wol ze ko^vffenn geben, wem sú wo^ellent, doch den egedâchten húsern vnd irn phlegern an iro rechten gantzlich vnscha^edlich, vnd wem sú o^vch denn die selben irú recht ze ko^vffenn gebent, dem sont ez der vorgedâchten húser phleger, wer die sint, ân allen fúrzug lihen vmb den zins vnd in allen den rechten dinge vnd gedinge, alz an disem brieue geschriben stât. Wa^er aber, daz die selben phleger, wer die wa^erint, dehaines jâres von der vorgeschribenn húser rechten dez egedâchten gůtes gân vnd die verko^vffen wo^eltint, so sont sú ez den obgenanten bûwlúten vnd iro êrben dez êrsten vail bieten vnd vor ma^englichem ze ko^vffenn geben o^vch fúnf schilling phenning Costenzer múnse na^eher vnd bas denn iemant andre, ob sú sie ko^vffen wo^ellent ald mûgent, wa^er aber, daz sú sie nút ko^vffen wo^eltint ald mo^echtint, so mûgent die selben phleger die vorgeschribenn recht dez egedâchten gůtes wol ze ko^vffenn geben, wem sú wo^ellent, doch den vorgenanten buwlúten vnd iro êrben gantzlich vnscha^edlich. Vnd ze offenem waren vrkúnde vnd sta^eter sicherhait aller dirre vorgeschribenn dinge vnd gedinge so haben wir vorgenempten Bartholome Blarer, V^olrich Ru^edger dez egedâchten spittâls phleger vnd maister, V^olrich Ko^echler o^vch phleger vnd maister dez selben spittâls vnd der egedâchten siechlin am Linsibu^el vnd V^olrich Spiesser o^vch der selben siechlin phleger vnd maister alle vnsrú vnd der vorgeschribenn zwaiger húser insigel fúr vns vnd vnser nâchkomen offenlich an disen brief gehenket, vnd won ich obgenanter Johans Appaceller o^vch der egedâchten siechlin phleger am Linsibu^el aigens insigels nút hatt, so han ich mich willeklich gebûnden vnder dez obgenanten V^olrichs Spiessers insigel aller dirre vorgeschribenn dinge vnd gedinge. Diz beschach vnd wart dirre brief geben ze sant Gallen in dem jâre, do von Cristi gebúrt wârent drúzehenhûndert jâr, achtzig jâre vnd dar nach in dem núnden jâre, an sant Othmars âbent.

Source Fulltext: Chartularium Sangallense X, Nr. 6358, S. 604-607.