Allen^a) den, die disen brief ansehent lesent oder ho^erent lesen, kúnde ich Johans Ru^edger von sant Gallen vnd vergich offenlich an disem brieff fúr mich vnd min erben, das ich || mit gůter vorbetrahtunge vnd mit miner frúnde rât mit den fromen wisen mit dem burgermaister mit den ra^eten vnd mit den burgern gemainlich der stat ze sant Gallen || lieplich vnd frúntlich verrihtet vnd verainbert worden bin vmb alle die sto^esse missehellung klagen vnd ansprachen, so ich zůtz in allen gemainlich vnd zů iro ieklichem be||sunder ald zů gemainer stat ze sant Gallen gehept han von miner gu^eter wegen gelegen ze Mo^erswille¹ vnd ze sant Gallen ligender vnd varender gu^eter, wie si benemmt sint, das si die selben minú gu^eter verko^vfft vnd sich dero wider minen willen vnderzogen hant, vnd vmb alle ander sachen schaden vflo^effe vnwillen vnd widerdriesse, wie oder wâ die vff lantgrihten oder ze sant Gallen ald anderswâ v^fgelo^vffen sint vntz her vff disen húttigen tag, als dirr brief ist geben, von der vorgeschribnen miner gu^eter wegen ald von der selben miner gu^eter stúren vnd zinsen ald von dehainerlay ander sachen vnd schaden wegen. Darvmb vnd vmb das alles bin ich mit in vnd si mit mir lieplich vnd frúntlich verrihtet vnd verainbert, vnd han ich darvmb vnd dafúr von den selben burgern vnd von gemainer stat ze sant Gallen willeklich genomen vnd enpfangen zwaihundert pfunt gůter vnd ga^eber Ytaliger haller, die ich in minen offenn rêdlichen gůten nutz bewêndet han vnd bekêrt. Vnd darvmb so han ich gelopt mit miner trúwe vnd han o^vch ich daran frilich vnd willeklich liplich zů got vnd zů den hailgen gesworn ainen gelêrten ait zů den hailgen mit v^fgehabnen vingern, das ich noch kain min erben noch ieman andre von v´nser wegen noch an v´nser stat die vorgedahten den burgermaister die ra^et noch die burger gemainlich der stat ze sant Gallen noch kainen burger ald burgerinen von sant Gallen besunder noch kain ir nachkomen von der vorgedahten sto^esse missehellung klagen vnd ansprachen wegen, so ich zůtz in gemainlich ald sunderlich gehêpt han von der vorgedahten miner gu^eter wegen noch von kainer ander sachen widerdriesse vnlustes v^flo^effe lantgrihten vnd schaden wegen, wie die vntz her vff disen húttigen tag, als dirre brief ist geben, von der vorgeschribner miner gu^eter ald von ander sachen wegen v^fgeloffen sint, es sie benemmpt ald vnbenemmpt, niemer fúrbass mêr so^ellint noch wellent ansprechen vftriben rehtuêrtgen bekúmberren bekrenken noch in kain wîse beswa^eren noch beschadgen weder mit gaistlichen noch mit weltlichen gerihten noch ân reht noch in kain wîse ân alle geua^erde. Vnd des ze mêrer sicherhait so han ich in zů mir ze rehten wern geben vnd gesetzt minen lieben vetter V^olrichen den Ru^edger vnd Cůnraten ab der Hůb, den man nemmt der Jo^ehler, burger ze sant Gallen, die hant baid vnuerschaidenlich gelopt willeklich mit ir trúwen, der vorgeschribnen rihtung fúr mich vnd min erben reht wern ze sinne vff gaistlichen vnd vff weltlichen gerihten vnd an allen stetten. Ich han o^vch gelopt vnd loben mit disem brief fúr mich vnd min erben, die obgenemten wern ze lo^esenn von allem dem schaden, in den si von diser gelúpt vnd werschafft wegen koment. Ich han o^vch gelopt vnd han in den vorgeschriben ait genomen vnd gesworn, wa^er das ich hinnanhin dehainer lay ander sto^ess missehellung oder ansprachen hêtt oder gewunni zů dehainem burger ald burgerinen von sant Gallen, vmb welherlay sache das wa^er, als dik das bescha^eh, das ich ie darvmb reht sůchen vnd reht nemen sol ze sant Gallen in der stat vnd niendert anderswâ nâch der selben stat ze sant Gallen reht vnd gewonhait ân geua^erde. Vnd des alles ze offemm wâren vrkúnde vnd ze ainer sta^eter sicherhait aller vorgeschribner dinge vnd vergiht so han ich Johans Ru^edger da vorgenemt min insigel fúr mich vnd fúr alle min erben offenlich gehenkt an disen brief, vnd wir die obgenanten V^olrich Ru^edger vnd Cůnrat ab der Hůb, den man nemmt der Jo^ehler, wern, als vorgeschriben ist, veriehent offenlich an disem brief ain gantz wârhait aller der dinge, so von v´ns da vorgeschriben stât an disem brief, vnd des ze mêrer sicherhait so habent wir o^vch v´nsrú insigel gehenkt an disen brief. Der ist geben ze sant Gallen an dem na^ehsten zinstag nach aller hailgen tag in dem iâre, do man von Cristus gebúrt zalte drúzehenhundert jor vnd darnach in dem núnvndahtzigosten jâre.

Source Fulltext: Chartularium Sangallense X, Nr. 6357, S. 603-604.