Ich^a) Walther der Blârrer statamman ze sant Gallen¹ tůn kunt vnd vergich offenlich mit disem brieue allen, die in || ansehent lesent oder ho^erent lesen, daz fúr mich kam in der stat ze sant Gallen an dem na^ehsten ma^entag vor sant || Martis tag, do ich offenlich an dez richs strâss ze geriht sass, der beschaiden kneht Johans Rugge von Friwîlle², vnd || offenot offenlich vor mir mit fúrsprechen vnd sprach, daz er mit gůter vorbetrahtung willeklich verko^vft hett vnd ze ko^vffenn geben hett reht vnd redlich den êrberen vnd wolbeschaidnen Bartholome Blârrer, Johansen Blarrer vnd Johansen Burgo^vwer pflegern der siechen dez spittals ze sant Gallen³ an dez selben spittals stat daz gůt vff dem Kapf⁴ gelegen vnder dem Rudmunten⁵, daz ainhalb stôsset an Laithůb⁶ vnd anderthalb an der Hurlaberg⁷, daz sin reht aigen wa^er, mit allen rehten nútzzen vnd gewonhaiten vnd mit aller zů geho^erde vmb nún pfunt vnd vmb sechs schilling pfenning gůter Costentzzer múnse, der er gantzlich von in gewert wa^er vnd enpfangen hett vnd an sinen offenn nutz bekêrt, vnd bat mich eruarn an ainer vrtail, wie er sich dez selben gůtes verzihen vnd in der vorbenemten pfleger hant bringen so^elt vnd mo^eht, daz ez kraft hett nv^ vnd o^vch hie nâch. Daz tet ich, vnd ward ertailt mit gemainer vrtail, sid daz selb gůt sin reht aigen wa^er, daz er ez dann an dez richs strasse den vorgenanten pflegern v^f geben so^elt an dez vorgeschribenen spittals stat, vnd daz daz dann also wol kraft vnd maht hetti nâch dem rehten. Darnâch do gab der êgenemt Johans Rugge daz vorgeschriben gůt vff dem Kapf mit allen rehten vnd mit aller zů geho^erde willeklich vnd frilich gantzlich vnd gar offenlich an dez rîchs strâsse reht vnd redlich v^f in der obgenanten pfleger hant an dez vorgeschribenen spittals stat vnd ze sinen handen vnd verzêch sich do offenlich vor mir an gemainem geriht willeklich vnd gern gantzlich vnd gar vnd verziht sich mit disem brieue fúr sich vnd alle sin erben gen den vorgenanten pflegern gen allen iren nâchkomen vnd gen dem vorgeschribenen spittal ze sant Gallen aller aigenschaft alles rehten aller vordrung vnd aller ansprâchen gaistlichs vnd weltlichs gerihtes, so er vnd sin erben, ob er enwa^er, an dem vorgeschribenen gůt hattent ald hie nâch iemer gewinnen mo^ehtint. Der vorgenemt Johans Rugge lobt o^vch da mit siner trúwe fúr sich vnd alle sin erben, dez vorgenanten gůtes vff dem Kapf vnd o^vch dez vorgeschribenen ko^vffes reht wern ze sinne nâch reht gen ma^enlichem vff gaistlichem vnd vff weltlichem geriht vnd an allen stetten, wâ vnd wenn ald wie dik sin die vorgenemten pfleger oder ir nâchkomen ald der vorgeschriben spittal ze sant Gallen bedurffent ald darumb v^f getriben ald angesprochen werdent, ân geua^erde. Vnd ze ainem wâren vrkúnde vnd gantzzer sicherhait aller der vorgeschribenen dinge vnd vergiht so han ich Walther der Blârrer amman da vorgenemt von dez gerihtes wegen min insigel gehenkt an disen brief, won ez o^vch mit gemainer vrtail ertailt ward, daz ich ez tůn so^elt. Diz beschach vnd ward dirre brief geben ze sant Gallen an dem vorgeschribenen na^ehsten ma^entag vor sant Martis tag in dem jâr, do man zalt von gottes gebúrt drúzehenhundert jâr vnd darnach in dem ain vnd sehszigosten jâre.

Source Fulltext: Chartularium Sangallense VII, Nr. 4766, S. 569.