Wir von gottes genaden abt Hainrich des gotteshuses ze sant Gallen² kunden allen dien, die disen brief iemer an gesehent || alder ho^erent lesen, ain warhait aller der dinge, so an disem brief geschriben stant. Wir veriehen das, das Walt her || der Vedrer burger ze Altsteten³ fur vns kam vnd vns bat, das wir luhin den zehenden ze Aichberg⁴ halben, der || da lit in der Owe⁵, swester Willinun Regenschis selgen wirtinnun vnd Walthern ir sun, den ha^et er vf gegeben fur sich vnd fur alle sin erbon, den haben wir fur luhen der vor genemten swester Willinun vnd ir sun Walthern ze rehtem lehen mit so^ellichem gedinge, das si in han sol, die wil so si lept, vnd ir sun Walt her, er sige pfaffe alder laige, vnd sol denne wider vallen an Walther den Vedrer ald an sin reht erbon. Wer och das, das du vor genemten swester Willi vnd ir sun Walther budorftint zů ir libes noturft den zehenden ze furcho^vfen, so son su den zehenden Walther dem Vedrer ald sinen rehten erbon wider gen ze ko^vffen, wer aber das, das Walt her der Vedrer^a) alder sin erbon den zehenden nut wo^eltin ald enmo^ehti vmbe su wider ko^vfen, sweders denne lepti, so sol swester Willi alder ir sun Walt her gewalt han ze furko^vfen den selben zehenden, swer inen aller maist dar vmbe git. Su kamen och des vberain, das Walther der Vedrer den zehenden enphangen het im vnd sinen erbon ierclich vmbe dru malter kornes baider korn, des sol er si ald ir sun ald ir gewissen botten weron ze sant Martis tult, ta^eti aber er des nut, swa su denne an der vordrung des vor geschriben zins schadhaft wurdin, des sol er su gerwe vnd genzlich ledig tůn. Ist aber das, das su das gut buhebent vnz an ir ende, so sol Walther der Vedrer ald sin erbon zwen Schilling phenninge Costenzer muns an sant Nicolaus kilchun⁶ geben, also das man iro baider jarzit began sol mit dien zwain Schillingen. Der selbon zwaier Schillingen son werden dem lupriester sehs Pfenninge, der das iarzit begat, sehs phenning an die kercen, die da zů gottes licham ho^eret, ainen Schilling vmbe brot armen luton ze ainer spa^ende. Vnd das dis war sige vnd sta^et belibe, so geben wir disen brief besigelt mit vnserm insigel. Dis beschach ze sant Gallen, in dem jar, do man zalt von gottes geburte druzehenhundert jar, dar nach in dem funfzehenden jar, an des haligen cruce tag in dem maien.

Source Fulltext: Chartularium Sangallense V, Nr. 2927, S. 279.