Allen^a) den, die disen brief ansehent lesent oder ho^erent lesen, kúnde ich Johans La^ebi kilchenherre || der lútkilchen ze Jonswille¹ vnd vergich offenlich mit disem brief, das ich mit gůter vorbe||Itrahtunge mit gelêrter pfaffen vnd mit ander wîser lút rât durch lûter gůt vnd || durch frid vnd schirm mines libes vnd gůtes mich willeklich vnd frilich verbunden han vnd verbinde mich mit disem brief gegen den fromen wîsen dem burgermaister dem rât vnd gegen den burgern gemainlich der stat ze sant Gallen, ir burger ze sinne fúnf ga^entzú iâr, dú nâch dem tag, als dirre brief ist geben, nâchanander aller schierost koment, also das ich in davon ieklichs der selben fúnf iarn besunder fúnf pfunt gůter vnd ga^eber Italiger haller ie vff sant Martins tag ze stúr vnd ze dienst geben sol vnd wil âne allen fúrzug vnd widerrede. Vnd mit namen hant si mir in disem burgreht vss gelâssen alle alt sto^ess vnd gaistlich sachen vnd was gaistlich sachen ru^ert, das si mir darinn nit gebunden sint ze helffenne, won als verre si gern tůnt. Ich han o^vch willeklich vnd offenlich gesworn ainen ait ze den hailgen mit gelêrten worten vnd mit v^f gebottenn vingern, das vorgedaht burgreht gegen den burgern vnd der stat ze sant Gallen getrúlich vnd êrberlich ze haltenn dú vorgeschriben iârzil v^s âne alle geua^erde. Vnd des ze offemm wa^vren vrkúnde han ich der obgenant Johans La^ebi kilchenherre als vorgeschriben stât min insigel offenlich gehenkt an disen brief. Der ist geben ze sant Gallen an dem na^ehsten dunstag vor sant Othmars tag in dem iâr, do man von Cristus gebúrt zalte drúzehenhundert jâr vnd darnach in dem drúvndahtzigosten iâre.

Source Fulltext: Chartularium Sangallense X, Nr. 5978, S. 151.