Wir Wentzeslaus von Beheim von gots gnaden hertzog ze Lucemburg ze Lothr(ingen) ze Brab(ant) vnd ze Lymburg¹ marcgraf des heiligin richs || vnd desselben dissit gebirges gemeiner vicarius embiten dem burgermeister dem rat vnd der stat gemeinlich ze sand Gallen vnser fru^ent||schafft vnd allez gůt. Vmb die gewo^enlichen zins vnd stu^er, als ir ierlich schuldig sit dem heiligin rich vff sand Mertins tag ze geben, || vnd uwern trvwn der allerdurchlu^ehtigst fu^erst vnd herr herr Karl Ro^emischer keyser ze allen ziten merer des richs vnd ku^enig ze Beheim vnser liber gnediger herr vnd bruder vormals hat geschriben vnd ernstlich geboten, daz ir vns an siner stat als sinem vnd des riches vicarien die su^ellet geben vnd niemand anders, alle die wil wir vicarie sin des heiligin riches, vnd daz er vch vnd alle stet quit vnd los sagt, wenn ir vns su^elich stu^er vnd zins habt gegeben vnd daz bewisen mu^eget mit vnsern quitbrifen gelicher wis, als ob ir daz mit siner maiestat insigel bewiset, als daz allez vo^elliclich ist begriffen in sinen brifen, die er den steten gemeinlich dar vmb vor ziten hat gesant. Dar vmb senden wir zu uw vnsern liben getrvwn Gunthern Tokler von Babemberg² vnsern secretarium vnd begern ernstlich, daz ir im die stu^er vnd zins, als ir vff den nehsten sand Mertins tag schuldig sit, vnuerzo^egenlichen gebt an vnserer stat vnd von vnsern wegen oder wem er daz mit sinen brifen beuilhet, ob er liht selber von anderer vnserer geschefft wegen zu den ziten niht mo^eht zu uw kumen, vnd wenn ir daz habt getan, so sagen wir vch von des heiligin richs vnd vnsern wegen dar vmb vff ditz iar quit ledig vnd los. Mit vrku^end ditz brifes mit vnserm insigel versigelt. Geben ze Bru^exel nach Cristes geburt dru^etzehen hundert aht vnd sehtzig iar, an dem nehsten mantag nach Michahelis.

Source Fulltext: Chartularium Sangallense VIII, Nr. 5147, S. 317-318.