Wir^a) Wenczlaw von gots gnaden Romischer kunig zu allen czeiten merer des reichs vnd kunig zu || Beheim embieten dem burgermeister rate vnd burgern gemeinlich der stat zu sant Gallen vnsern || vnd des reichs liben getrewen vnser gnad vnd alles gut. Liben getrewen, vmb die gewonliche stewer, || die ir vns vnd dem reiche alle jare vf sand Merteins tage zu geben pflichtig seit, heissen vnd gebieten wir euch ernstlichen vnd vesticlichen bey vnsern vnd des reichs hulden, das ir von vnsern wegen Hansen von Bodmen³ vnserm diener vnd liben getrewen die nehest zukumftige sand Merteins tage stewre als von disem jare genczlichen richtet vnd beczalet. Wann so ir das getan habet, so sagen wir euch von vnsern vnd des reichs wegen der egenanten zukumftig sand Merteins tag stewre als von disem jare genczlichen vnd gar qweit ledig vnd loze. Mit vrkunt dicz briues versigelt mit vnserm kuniclichen maiestat insigel. Geben zu Nuremberg noch Crists geburte dreiczenhundert jar vnd dornach in dem siben vnd achczigistem jare, des montags noch dem suntag, als man singet Letare in der vasten, vnserr reiche des Behemischen in dem virvndczweinczigisten vnd des Romischen in dem eynlefften jaren.

Source Fulltext: Chartularium Sangallense X, Nr. 6173, S. 373.