Wir^a) Wilhelm von gotes genâden besta^eter abt dez gotzhus ze Salmanswiller¹ in Costentzer bistům gelegen tu^egint kunt vnd veriehent offenlich || mit disem brieue fúr vns vnd alle vnser nâchkomen allen den, die in sehent lesent oder ho^erent lesen, daz fúr vns kâment ze Salmanswiller diz || nâchgenempten fromen wolbeschaidenn lúte Go^eswin von Hohenfêls vnd frow Elzbeth sin êlichi husfrow hern Burkartz sa^eligen von Wartensêw || ritters êlichi tochter an ainem tail vnd Johans Eggrich Bartholome Eggrichs êlicher sun burger ze sant Gallen an dem andern tail, vnd offnotont o^vch do die ietzgenempten Go^eswin von Hohenfels vnd frow Elzbeth sin êlichi wirtinne offenlich vor vns vnd sprâchent, daz sú mit gůter vorbetrachtung vnd mit wolbeda^vchtem můte von iro rêdlicher not wegen den obern hof vnd den vndern hof ze Bregentzdorf mit aller zůgeho^erde recht vnd rêdlich verko^vfft vnd ze ko^vffen geben hettint dem vorgenempten Johansen Eggrich vnd sinen êrben vnd nâchkomen vmb zwai hundert phunt vnd vmb fiertzig phunt phenning gůter Costentzer múnse, der sú gantzlich gewert wa^erint worden vnd an iro offenn nutz bewendet hettint, dú selben gu^eter von vns vnd von dem vorgenempten vnserm gotzhus iro êrblêhen wârent, vnd ba^vtent vns, daz wir dú selben vorgeda^vchten gu^eter vnd ho^ef von iro handen vf an vnser hand na^emint mit allen irn rechten vnd zůgeho^erden vnd sú dem egenempten Johansen Eggrich lihint ze ainem rechten êrblêhen. Do erhortont wir iro ernstlichen bette vnd nâment von iro baider handen vf an vnser hand dú vorgeschribenn gu^eter den obern hof vnd den vndern hof ze Bregentzdorf mit aller zůgeho^erde vnd lihentz dem egenempten Johansen Eggrich ze rechtem êrblêhen vnd lihent ims mit disem brieue mit hus mit hof mit wingarten mit akkern mit wisen mit stegen mit wegen mit wasen mit zwij mit gengen mit allen rechten nútzen gewonhaiten vnd zůgeho^erden, so von recht ald von gewonhait dârzů vnd dar in geho^erent ald vntz her geho^ert hant, vnd sol vns vnd vnserm gotzhûs dâr vs vnd da von nút mêr gân denn der gross zehent vnd ain fierdung wachs von dem obern hof vnd ain fierdung wachs von den^b) vndern hof, vnd verzigent sich o^vch do die vorgenempten Go^eswin von Hohenfels vnd frow Elzbeth sin êlichi hûsfrow offenlich vor vns nâch allen vnsren vnd vnsers êgeda^vchten gotzhus sitten rechten vnd gewonhaiten vnd verzihent sich fúr alle iro êrben gen dem vorgenempten Johansen Eggrich vnd gen allen sinen êrben vnd nâchkomen der vorgeschribenn ho^ef vnd gu^eter ze Bregenzdorf vnd aller iro zůgeho^erde aller lêhenschaft aller kuntschaft aller gewêr lút vnd brief alles rechten aller vordrunge vnd aller anspra^vchen, so sie ald iro êrben vnd nâchkomen dâr an ald dârzů ie gehebt hant ald hie nâch iemer mêr gehaben oder gewúnnen mo^echtint vff gaistlichem oder vff weltlichem gerichte ald ân gericht oder mit dehainen andern sachen, ân gefa^erde. Wa^ere o^vch, daz der obgenant Johans Eggrich von disen vorgeschribenen gu^etern vnd ho^efen dehainest verko^vffti ald da von gân wo^elti, wer der wa^ere, fúr den er vns ba^ete, ders von vns enpha^ehen wo^elte, so habent wir im die besundern genâde getân, daz wir im gelobt hant vnd lobent im mit disem brief, daz wir ald vnser nâchkomen dú vorgeschribenn gu^eter vnd ho^ef ze Bregenzdorf mit allen den vnd in allen den rechten, als wirs im ietz gelihen hant, dem selben, fúr den er bittende wa^er, als vor beschaiden ist, lihen súllent vnd wo^ellent ze gelicher wise als im selber ân alle gefa^erde. Vnd ze offenem wâren vrkúnde vnd sta^eter sicherhait diser vorgeda^vchten lêhenschaft vnd aller dirre vorgeschribenn dinge vnd gedinge so haben wir abt Wilhelm da vor genempt abt dez vorgeschribenn gotzhûs vnser abtye insigel fúr vns vnd vnser nâchkomen offenlich an disen brief gehenket. Der geben wart ze Salmanswiller in dem jâre, do von Cristus gebúrt wârent drútzehenhundert vnd achtzig jâr vnd dâr nâch in dem sibenden jâre, an dem na^ehsten zinstag nâch sant Agten tag.

Source Fulltext: Chartularium Sangallense X, Nr. 6168, S. 368-369.