Wir^b) . . die burger dez rats der stat zu^e Nu^eremberg veriehen offenlichen mit || disem brief allermeniclichen, daz wir vns erfaren haben an den, die den zol || eingenomen haben von dez hochgebornen fúrsten vnd herren herren Fridrichs dez || burkgrafen wegen zu^e Nu^eremberg¹, der dez heiligen reichs ist, daz sie von der stat zu^e sant Gallen vnd den iren bey vns zu^e Nu^eremberg dheinen zol vormals niht eingenomen haben. Dorvmb tun wir derselben stat zu^e sant Gallen vnd den iren die besu^endern frewntschaft, die weil vns der egen(an)ten zol von dem obgenan(ten) herren stet vnd den ynnen haben, daz wir dheinen zol bey vns von in nicht nemen wellen, doch also daz sie die recht alle iar daruon raichen vnd geben sullen, als von alter her komen ist. Mit vrkunde ditz briefs versigelt mit vnserm anhangendem insigel. Geben am donerstag vor sant Tiburtius tag nach Cristus gebu^ert drewzehenhundert iar vnd in dem sibenvndachtzigistem jare.

Source Fulltext: Chartularium Sangallense X, Nr. 6179, S. 377-378.