Allen^a) den, die disen brief ansehent lesent oder ho^erent lesen, kv´nde ich Cůnrat Wigerman vnd vergich offenlich an disem brief fúr || mich vnd alle min erben, das mir die erbern lút V^olrich Ko^echler, V^olrich Spiesser vnd Johans Appaceller pfleger der armen siechan || ze sant Gallen an dem Linsibu^el¹ an der selben armer siechan stat vnd in iro namen reht vnd rêdlich verlihen hant das gůt ze Wîlla², || das gelegen ist entzwúschent Tâtenwille³ vnd dem Friendorff⁴, ze ainem rehten sta^eten êrbzinslehen, also mit der beschaidenhait, das ich vnd min erben, ob ich enbin, das selb gůt ze Willa mit allen rehten vnd zůgeho^erden vnwůsteklich haben vnd niessen besetzen vnd entsetzen so^ellin, vnd so^ellin ich vnd min erben den selben armen siechan vnd den vorgenemten iren pflegern ald iren nâchkomen zů der selben armer siechan handen da von aller ia^erklich ie vff sant Gallen tag zehen schilling pfenning gůter Costenzer múnse ain malter gůter vesan sant Galler messes vnd zwai hu^enr ze rehtem ia^erlichen zins vnd darzů gen Arbon⁵ ainen mut habern des vorgeschribenn messes gantzlich vnd gar geben vnd rihten âne allen fúrzug vnd widerrêde vnd âne allen der selben armer siechan schaden âne alle geua^erde. Vnd welhes iâres ich ald min erben das nit ta^etint, so sont vnd mugent die selben armen siechen vnd ir helffer vnd ir pfleger, welhi ie dann ir pfleger sint, an iro stat mich vnd min erben ie nâch sant Gallen tag darvmb angriffen pfenden vnd no^eten vff dem selben gůt oder anderswâ an allen v´nsern gu^etern in stetten oder vffemm lande mit gaistlichen oder mit weltlichen gerihten vnd ân reht, wie vnd wâ si das getůn mugent, als vil vntz si ie des vorgedahten ir zins vnd des mut habern in der wîse, als vor ist beschaiden, vnd o^vch des schaden, in den si vnd ir pfleger vnd ir helffer von des selben pfendens no^etenns vnd angriffenns wegen koment, gantzlich gewert v^ssgeriht vnd entschadgot werdent. Vnd mit namen ist berêtt, wa^er das ich ald min erben inen den vorgedahten zins vnd den mut haber gen Arbon dehaines iâres versa^essint, als lang bis das ain zins den andern erloffen hêtti, so sol dann das selb gůt ze Willa den vorgedahten armen siechan vnd iren nâchkomen gantzlich zinsvellig sin vnd lêdig, vnd sont vnd mugent dann die selben armen siechan vnd ir pfleger an iro stat das selb gůt ze Willa mit allen rehten vnd zůgeho^erden haben niessen verko^vffen versetzen besetzen vnd entsetzen vnd damit tůn, was si went oder in fůgklich ist, vnd so^ellin wir sú daran niht sumen noch irren in kain wîse. Es ist o^vch bedingot, bescha^eh das ich oder min erben dehaines iâres von v´nsren rehten des vorgeschriben gůtes vnd êrblehens gân vnd die verko^vffen woltint, das wir dann dú selben v´nsrú reht den vorgedâhten armen siechan vnd iren pflegern an iro stat des ersten vail bieten vnd vor ma^englichem ze ko^vffenn geben so^ellin, ob si sie ko^vffen wênt, vnd súllent in o^vch dú selben v´nsrú reht fúnf schilling pfenning Costenzer múnse na^eher geben denn iemann andre, wa^er aber, das si sie dann nit ko^vffen woltint ald mo^ehtint, so mugent wir dannanhin dú selben v´nsrú reht wol ze ko^vffenn geben, wem wir wellent, inen an allen iren rehten gantzlich vnscha^edlich. Bescha^eh o^vch, das die selben arme siechen oder ir nâchkomen dehaines iâres von iren rehten des vorgeschriben gůtes vnd erblehens gan vnd die verko^vffen woltint, so ist o^vch bedingot, das si mir vnd minen erben, ob ich enbin, dú selben irú reht des ersten vail bieten vnd vor ma^englichem ze ko^vffenn geben sont, ob wir si ko^vffen wellent, vnd sont v´ns o^vch die selben irú reht fúnf schilling pfenning der vorgeschribnen múnse na^eher geben denn iemann andre. Wa^er aber, das wir si danne nit ko^vffen woltint ald mo^ehtint, so mugent si dannanhin dú selben irú reht o^vch wol ze ko^vffenn geben, wem si went, v´ns an allen v´nsren rehten gantzlich vnscha^edlich. Vnd des alles ze offemm wâren vrkúnde vnd ze ainer sta^eten sicherhait aller vorgeschribnen dinge vnd gedinge so han ich der obgenant Cůnrat Wigerman erbetten die fromen manne Johansen Blarrer Pfilippen Blârrers sa^eligen sun ze den ziten burgermaister ze sant Gallen⁶ vnd Kasparn Vo^elin hofamman ze sant Gallen⁷, das sú baid irú insigel fúr mich gehenkt hant an disen brief inen vnd iren erben gantzlich vnscha^edlich, vnder dú selben insigel ich mich vnd alle min erben gebunden han aller vorgeschribnen dinge, won ich nit aigens insigels hatt. Dirr brief ist geben ze sant Gallen an sant Pfilippen vnd sant Jacobs âbent der hailgen zwelffbotten in dem iâre, do man zalte von Cristus gebúrt drúzehenhundert jâr, ahtzig iâr vnd darnach in dem sibenden jâre.

Source Fulltext: Chartularium Sangallense X, Nr. 6180, S. 378-379.