. . Officialis curie Const(antiensis) universis tam presentibus quam futuris, ad quos presentes pervenerint, notum facimus per presentes, || quod constitutus coram nobis Const(a)n(ti)e iudicii in figura sub anno domini millesimo tricentesimo quinquagesimo || primo die martis proxima post festum beati Jacobi apostoli hora prime Johannes dictus Mu^etinger familiaris || noster^a) publicus auctoritate imperiali et curie nostre Const(antiensis) notarius asserens, quod licet minister et consules oppidi sancti Galli ipsum Johannem nullis ipsius demeritis exigentibus captivaverint et captivatum aliquamdiu detinuerint, quia tamen dicti minister et consules se cum dicto Johanne amicabiliter composuerunt super captivatione et detentione predictis, idcirco dictus Johannes libere et sine omni coactione deliberatione prehabita diligenti ad sancta dei evangelia coram nobis corporate prestitit sacramentum super quibusdam articulis infrascriptis. Nam primo idem Johannes omnem actionem rancorem et inimicitiam, quos adversus predictos ministrum et consules aut alios quoscumque dicte captivationis quomodocumque participes habuit, habet vel habere posset, verbis expressis et ad hoc aptis coram nobis deposuit et remisit. Item quod in virtute dicti iuramenti sui prestiti huiusmodi iniuriam et offensam occasione dicte captivationis sibi per dictos ministrum et consules, ut premittitur, illatam numquam refricet aut refricari faciat quoquomodo per se vel per alium directe vel indirecte tacite vel expresse aut quod aliquem aliquos ipsorum super hiis in iudicio vel extra spirituali vel seculari ullo unquam tempore molestet seu quoquomodo perturbet. Quodque sine dolo et fraude in virtute dicti iuramenti omnes suos consanguineos et amicos ad premissa faciendum inducat. Ac deinde nobis . . officiali predicto instanter et humiliter suplicavit, ut et nos iniuriam nobis et iudicio nostro¹ in personam dicti Johannis illatam similiter predictis ministro et consulibus ac aliis personis quibuscumque remittere et ignoscere dignaremur. Nos vero ad instantes preces dicti Johannis et parentum suorum omnem offensam et iniuriam nobis et iudicio nostro in personam dicti Johannis illatam ex nunc remittimus et ipsis ignoscimus per presentes. Et in huius rei testimonium et premissorum omnium evidentiam ad preces dicti Johannis et parentum suorum sigillum curie nostre una cum appensione sigilli dicti Johannis presentibus duximus appendendum. Datum Const(antie) anno domini millesimo trecentesimo quinquagesimo primo, VII^o. kal. augusti, indictione quarta.

Source Fulltext: Chartularium Sangallense VII, Nr. 4226, S. 136-137.