Allen^a) den, die disen brief ansehent lesent oder ho^erent lesen, kúnde ich Johans Broter || der messerschmit burger ze sant Gallen vnd vergich des offenlich an disem brieff || fúr mich fúr min erben vnd nâchkomen von des huses vnd hofstat wegen gelegen || ze sant Gallen in der stat, das ainhalb sto^vsset an Jacob des Sailers sa^eligen hus vnd anderthalb an Haini A^enderlis hus, das min vnd Jacob Gramans v´nser baider gemainlich ist, das mir die fromen wisen der burgermaister vnd der rât ze sant Gallen durch min bett gegunnen vnd erlo^vbt hant, das ich ain schmitten in das selb hus gesetzt han vnd das ich vnd alle min erben vnd nâchkomen, in dero hant das selb hus kumt, das selb min antwerk messerschmiden fu^eren so^ellin vnd mugent, doch so^ellin wir das antwerk, das man nemmt hůffschmiden, darinne niht triben noch das selb hus kainem hůffschmit verlihen, der da hůffschmiden wo^elte, es wa^er denne, das es ain rât ze sant Gallen verhangdi vnd es mit des selben rates gůtem willen vnd gunst zůgienge. Vnd des ze offemm wâren vrkúnde han ich der obgenant Johans Broter der messerschmit min insigel fúr mich fúr alle min erben vnd nâchkomen gehenkt an disen brief. Der ist geben ze sant Gallen an dem na^ehsten zinstag vor aller hailgen tag, do von Cristus gebúrt wârent drúzehenhundert jâr vnd darnach in dem ain vnd ahtzigosten jâre.

Source Fulltext: Chartularium Sangallense IX, Nr. 5874, S. 538.