Wir^a) dis nâchgenemten V^olrich Ko^echler, V^olrich Spiesser vnd Johans Appaceller pfleger vnd maister der armer siechen ze sant Gallen an dem Linsibu^el¹ tůnt kunt vnd veriehent offenlich an || disem gegenwúrtigen brief fúr vns vnd fúr alle v´nser nachkomen, welhi ie dann pfleger vnd maister der selben armer siechan sint ald werdent, allen den, die disen brief ansehent lesent oder ho^erent || lesen, won die ersamen beschaiden her Bertolt Bra^endli capplan der vorgedahten armer siechen vnd swester Adelhait La^eberin sin mům sin kellerin den selben armen siechen vil vnd ma^enigerlay || trúwe vnd nutzlich gůt dienst vnd fúrdrung durch got besunder vnd durch iro selan vnd durch aller gelo^vbigen sêlan hailes vnd trostes willen vil vnd dik getan vnd erzaigt hant vnd sunderlich daran, das sú den selben armen siechen vnd v´ns zů der selben armer siechen handen vnd nutz frilich geben vnd gewert hant an barem gelt fúnf vnd zwainzig pfunt vnd fúnf schilling pfenning gůter vnd gena^emer Costentzer múnse, damit wir den selben armen siechen drú malter vesan zwen mut kernen sant Galler messes vnd zwai hu^enr alles ia^erkliches geltes vsser dem hof ze Nidren Lo^ern² vnd vsser dem hof ze Loch³ bi Ramswag⁴ erko^vfft habent, die selben nutzlich gâbe vnd grosse trúwe habent wir aigenlich angesehen bekennt vnd betrahtot, won o^vch das billich ist, vnd habent darvmb mit rât vnd mit gůter vorbetrahtunge ainmu^eteklich willeklich vnd frilich an der selben armer siechen stat fúr v´ns vnd fúr alle v´nser nâchkomen den obgenanten hern Bertolten vnd swester Adelhaiden La^eberinen siner můmen die gnâd getân vnd tůnt mit disem brief, das sú baidú gemainlich alle die wîle sú baidú lebent, vnd wenne aines vnder inen von todes wegen enist, das selb besunder, das dennoht vnder inen baiden lebet, o^vch alle die wile das selb lebet, die vorgeschriben drú malter vesan zwen mut kernen vnd die zwai hu^enr vsser den vorgeschribnen zwain ho^efen an der vorgedahten armer siechen stat vnd von iro wegen aller ia^erklich gantzlich vnd gar innemen haben vnd niessen sont vnd sol ze ainem rehten lipdinge, vnd das wir noch v´nser nâchkomen noch ieman von v´nsern wegen die selben hern Bertolten noch swester Adelhaiden daran niemer sûmen irren schadgen bekúmberren noch beswa^eren so^ellint noch wellent in kain wîse, alle die wîle sú baidú lebent oder aines vnder in, vnd wenne die selben her Bertolt vnd swester Adelhait baidú von todes wegen abgangen sint, so sol das vorgeschriben ja^erklich gelt an vesan an kernen vnd an hu^enren den obgedâhten armen siechen gantzlich ledig sin, vnd sont der selben hern Bertoltz noch swester Adelhaiden êrben dannanhin enkain reht vordrung noch ansprach darzů niemer mê haben noch gewinnen weder vff gaistlichem noch vff weltlichem geriht noch an dehainen stetten, vnd won wir die obgenanten pfleger vnd maister die obgenanten erbern lút hern Bertolten vnd swester Adelhaiden sin můmen der vorgedahten trúwe vnd nutzlicher gůter dienst, die sú den vorgedahten armen siechen vil vnd dik getân hant, als vor ist beschaiden, mit dem vorgedâhten lipdinge dennoht vnergêtzt vnd vngedankot habent, darvmb so habent wir v´ns vnd v´nser nachkomen vnd die selben armen siechen fúrbass gebunden vnd bindent vnd lobent mit disem brief also, wenne die selben her Bertolt Bra^endli vnd swester Adelhait sin mům baidú von todes wegen abgangen sint, das wir dann vnd v´nser nâchkomen von dem vnd vsser dem vorgeschriben korn gelt vnd hu^enr gelt sehs vnd vierzig pfunt vnschlit aller ia^erklich vnd êweklich ie vff sant Martins tag geben vnd rihten so^ellin vnd wellent, also das man mit dem selben vnschlit vnd mit den viervndzwainzig pfunt vnschlit, die man von des gůtes wegen am Júch⁵ gewonlich daher geben hât an das nahtlieht in die kilchen an dem Linsibu^el fúr frônaltar, ain êwig lieht haben sol in der selben kilchen an dem Linsibu^el vor frônaltar, das durch den tag vnd durch die naht sta^eteklich ân vnderlâsse brúnnen sol, vnd das man darzů in der selben kilchen vor dem nidern altar ain êwig lieht o^vch haben sol ze disen nâchgenemten hohziten vnd haiiger tagen, das ist ze dem hailgen tag ze wihenna^ehten, ze sant Stephans tag, ze sant Johans tag des Ewangelisten, ze dem inga^enten iâre, das man nemmt in latyn circumcisio domini, ze dem zwelften tag, den man nemmet in latyn epiphanya, ze dem palme tag, ze dem grossen dunstag, ze dem stillen fritag, ze dem hailgen âbent ze ostran, ze dem hailgen tag ze ostran, ze dem ma^entag vnd zinstag in der osterwochen, ze v´nsers herren v^ffart tag, ze dem hailgen tag ze pfingsten, ze dem ma^entag vnd zinstag in der pfingstwochen, ze v´nsers hêrren frônlichams tag, ze v´nser fro^vwen tage ze der liehtmisse, ze v´nser fro^vwen tag ze dem a^ernde, ze v´nser fro^vwen tage, als si ze hymel fůr, ze v´nser fro^vwen tage, als si geborn wart, ze v´nser fro^vwen tage, als si enpfangen wart, ze aller vnd ieklichs hailger zwelfbotten tage, ze sant Johans tag des To^vffers, ze sant Marien Magdalenen tag, ze sant Martins tag, ze sant Nycolaus tag, ze sant Laurentius tag, ze sant Katherinen tag, ze baiden kilwinen vnd ze allen der vorgenemten hohziter vnd haiiger vigilien vnd âbenden, durch die naht vnd mornent den tag allen, als vor ist beschaiden, vnd was dann an den vorgedahten drien malter vesan an den zwain mut kernen vnd an den zwain hu^enren ie des iâres vorbestât vnd v´ber wirt v´ber das wir die vorgeschriben sehs vnd vierzig pfunt vnschlit da von gantzlich gerihtent an die selben lieht, als vor ist beschaiden, das sol man allweg ie den vorgedahten armen siechen allain geben vnd allen iren nâchkomen irú mâl damit ze bessrenn oder was sú gerne darvmb haben went, das sol man in ie dann vollfu^eren geben vnd tůn vnuerzogenlich vnd getrúlich vnd in damit willgen ân alle widerrêde. Vnd so^ellin wir vnd v´nser nâchkomen bi gůten trúwen versorgen vnd schaffen endlich, das die vorgedahten lieht êweklich vollbrâht vnd gevêrtgot werdint vnd fúrderlich vnd das den selben armen siechen vnd allen iren nâchkomen o^vch widerfare vnd vollefu^ert werde in aller wîse, als vor ist beschaiden, got ze lob vnd ze êren vnd durch der obgenanten hern Bertoltz vnd swester Adelhaiden siner můmen selan durch iro vordem selan vnd durch aller gelo^vbigen sêlan hailes vnd trostes willen. Bescha^eh o^vch, das die vorgedahten arme siechen oder wir ald v´nser nâchkomen an iro stat das vorgedaht korngelt vnd hu^enr gelt iemer verko^vfftint ald da von gân mu^esstint, so so^ellin wir vnd v´nser nâchkomen die vorgedâhten êwigú liehter vnd alle vorgeschriben sachen setzen ordnen besta^etgen vnd versicherren, wie notdúrfftig ist, vff a^endrú der selben armer siechen gelegnú gůt, die darzů gewiss gnůg sien, in aller wise vnd mit allen den stuken vnd gedingen, als vor ist beschaiden, âne alle geua^erde. Vnd das dis alles, so hie vorgeschriben stat an disem brief, wâr sta^et vêste êwig vnd vnwandelber belîbe, darvmb so habent wir die obgenanten V^olrich Ko^echler vnd V^olrich Spiesser pfleger vnd maister, als vorgeschriben stât, v´nsrú insigel vnd der vorgedâhten armer siechen insigel fúr v´ns vnd fúr alle vnser nâchkomen vnd fúr die selben armen siechen offenlich gehenkt an disen brief, vnd won ich der obgenant Johans Appaceller mitpfleger, als vorgeschriben stât, aigens insigels niht hatt, so han ich erbetten den fromen Johansen Blârrer Pfilippen Blârrers sa^elgen sun ze disen ziten burgermaister ze sant Gallen⁶, das er sin insigel fúr mich o^vch gehenkt hât an disen brief, vnder das selb insigel ich mich vnd min nâchkomen willeklich gebunden han aller vorgeschribner dinge, vnd ich der selb Johans Blârrer burgermaister, als vorgeschriben stât, vergich offenlich, das ich von bett des selben Johansen Appacellers mitpflegers, als vor geschriben stât, min insigel fúr in gehenkt han an disen brief mir vnd minen erben vnscha^edlich. Dirre brief ist geben ze sant Gallen an dem na^ehsten dunstag vor sant Gallen tag in dem iâre, do man von Cristus gebúrt zalte drúzehenhundert jâr, ahtzig iâr vnd darnach in dem sibenden jâre.

Source Fulltext: Chartularium Sangallense X, Nr. 6213, S. 420-422.