Wir^a) Wenczlaw von gotes gnaden Romischer kunig zu allen czeiten merer des reichs vnd kunig || zu Beheim embieten dem burgermeister rate vnd burgern gemeinlichen der stat zu sand Gallen || vnsern vnd des reichs lieben getrewen vnser gnade vnd alles gute. Lieben getrewen, vmb die gewonlich || stewre, die ir vns vnd dem reiche alle jar vf sand Merteins tage pflichtig seit zugeben, heissen vnd gebieten wir euch ernstlich vnd vesticlich bey vnsern vnd des reichs hulden, das ir Hansen von Bodmen vnserm diener vnd lieben getrewen dieselbe stewre des jares, als man czelet noch Crists geburd dreyczenhundert jar vnd achtvndachczig jare, vf sand Merteins tag desselben jares genczlichen von vnsern vnd des reichs wegen richtet vnd beczalet. Wann so ir das getan habt, so sagen wir euch derselben sand Merteins tage stewre des egenanten jares genczlich vnd gar qweit ledig vnd loze. Mit vrkunt dicz briefs versigelt mit vnserr kuniclichen maiestat insigel. Geben zu Prage noch Cristes geburd dreyczenhundert jar, dornach in dem sibenvndachczigisten jaren, des montags in der crewcz wochen, vnserr reiche des Beheimschen in dem viervndczweinczigisten vnd des Romischen in dem eynleften jaren.

Source Fulltext: Chartularium Sangallense X, Nr. 6184, S. 384.