Ich^a) Jacob Růpreht, den man nemmt der Lo^ew, ze disen ziten statamman ze sant Gallen¹ tůn kunt vnd vergich des offenlich an disem brieff allen den, die in sehent || lesent oder ho^erent lesen, das fúr mich kam ze sant Gallen in der stat an dem na^ehsten zinstag vor sant Laurencius tag, do ich an des riches strâsse von || des nâchgenemten V^olrich Midensuns ernstlicher bett wegen offenlich ze geriht sass, der selb V^olrich Midensun von sant Gallen ze disen ziten burger ze V´berlingen² || vnd offnote vnd veriah da der selb V^olrich Midensun offenlich frilich vnd willeklich vngebunden vnd vngeuangen vor mir in dem gerihte mit sinem fúrsprechen von der vanknust wegen, als in die fromen wîsen der burgermaister vnd der rât gemainlich ze sant Gallen gehaimot vnd in in iro vanknust vnd banden hattent vmb das, das er Herman den Gailer irn mitburger ze sant Gallen gezigen hatt, er hêtti im sin brief entwêrt vnd verstoln, vnd aber der selb Herman Gailer dawider rêtt, er wa^er des vnschuldig vnd wo^elt o^vch des vnschuldig werden, wie reht wa^er, darvmb o^vch der rât ze sant Gallen si baid gehaimot hattent, vnd won aber die selben der burgermaister vnd der rât ze sant Gallen in durch sin vnd durch der êrwirdigen des burgermaisters vnd des rates der stat ze V´berlingen ernstlicher bett willen vss der selben vanknust ledig gelâssen hêttint, so wo^elti er sich aller diser nâchgeschribnen sachen willeklich vnd gern verbinden, als hie nach beschaiden ist an disem brief. Des ersten do swůr der selb V^olrich Midensun offenlich vor mir in dem gerihte frilich vnd willeklich vnd vnbetwungenlich vngebunden vnd vngeuangen gesunt libs vnd můtes mit gůter vorbetrahtunge ainen gelêrten ait liplich zů got vnd zů den hailgen mit v^fgehêpten vingern, vmb die vorgedâhten vanknust der vorgedâhten des burgermaisters des rates vnd aller burger gemainlich von sant Gallen vnd iro ieklichs besunder vnd sunderlich des obgenanten Herman Gailers vnd mit namen aller ma^englichs, wer an der selben siner vanknust dehain schuld in dehain wîse gehêpt hât ald râtent helffent ald gehaft darzů gewesen ist, lûter gantz vnd gůt frúnde ze sinne vnd alle sin frúnd inen darvmb ze frúnd ze gewinnenn ân allen fúrzug vnd die selben vanknust vnd getât niemer ze andenn noch ze a^eferrenn weder mit gaistlichem noch mit weltlichem geriht noch ân reht noch in kain wîse noch ieman von sinen wegen âne alle geua^erde. Er nam o^vch in den selben ait vnd swůr, wa^er das er zů den selben dem burgermaister dem rât oder zů den burgern gemainlich der stat ze sant Gallen oder zů iro dehainem besunder fro^vwen ald man ald zů iren bûlúten ald hindersa^essen iht ze sprechenn hêtt oder ze sprechenn gewunne, vmb welherlay sach das wa^er, das er ie darvmb reht vordem vnd reht von in nemen sol ze sant Gallen in der stat vor dem geriht da selbs nâch der selben stat reht vnd gewonhait vnd niendert anderswa, es wa^er dann, das er in der selben stat ze sant Gallen rehtlôs gelâssen wurdi vnd das das kuntlich wurdi vor ainem burgermaister vnd dem rât ald besorgern gemainlich ze sant Gallen, ob da niht râtes wa^er, so sol vnd mag er ie dann sin reht anderswa sůchen, da es im fůgklich ist. Wa^er aber, das er ald ieman von sinen wegen darv´ber die vorgedahten vanknust in dehain wîse andotti ald a^eferti vnd sinen ait an dem selben stuk v´berfu^eri vnd das sich des ain burgermaister vnd der rât ald besorger gemainlich ze sant Gallen, ob da niht râtes wa^er, ald der mertail vnder in vff ir trúwe vnd êr erkantint, das er den vorgeschriben sinen ait an dem selben stuk v´berfarn hêtt, wenn oder wâ das bescha^eh, das dann die selben der burgermaister der rât ald besorger vnd die burger alle gemainlich der stat ze sant Gallen ald iro ieklicher besunder vnd wer in des helffen wil, den selben V^olrich den Midensun haimen vnd vâhen sont vnd mugent ân alles reht vnd ân allen zorn vff dem lande in do^erffern ald in stêtten oder wâ si in dann ankomen ald ergriffen mugent, vnd das si den selben V^olrich Midensun danne fúr ainen scha^edlichen verschulten vnd vertailten man verdêrben vnd von dem libe tůn sont vnd mugent âne alles reht vnd âne vrtail. Des hât sich der obgenant V^olrich Midensun mit namen offenlich vor mir in dem geriht frilich vnd willeklich vngebunden vnd vngeuangen gesunt libs vnd můtes vnd mit bedâhtem můt verbunden vnd verstrikt, das in da vor noch dawider niht schirmen sol enkain frihait noch gewonhait enkain reht weder gaistlichs noch weltlichs gerihtes enkain gesetzt noch buntnust der herren noch der stêtte enkain burgreht noch lantreht noch der stêttreht noch frihait noch enkainerlay ander sach noch schirm, won er sich mit namen verzigen hât aller helffe aller gnâden alles v^szugs alles schirmes vnd alles des, damit er sich wider die vorgeschriben sach vnd buntnust iemer gesetzen ald dawider gereden ald gewerben kundi oder mo^ehti in dehain wîse. Darnach bâtt mich der selb V^olrich Midensun mit sinem fúrsprechen, das ich erfu^eri an ainer vrtail, ob er die vorgeschriben sach vnd vergiht vnd das vorgedâht verbinden getân vnd vollfu^ert hêtt, das es krafft hêtt vnd haben mo^eht nâch dem rehten. Do frâgte ich vorbenemter amman vrtail vmb vnd wart ertailt mit gemainer vrtail, das der obgenant V^olrich Midensun die vorgeschriben vergiht vnd sach vnd das vorgeschriben verbinden mit sa^emlichen worten werken geba^erden vnd geta^eten getan vnd vollfu^ert hêtt, das es billich kraft vnd maht haben sol vnd mag nâch dem rehten ietzo vnd hienach. Vnd des alles ze offemm wâren vrkúnde so han ich Jacob Růpreht statamman da vorgenemt min insigel nâch rehter vrtail offenlich gehenkt an disen brief, won es ertailt wart, das ich es tůn so^elt. Darnach vergich ich der obgenant V^olrich Midensun ain gantz wârhait aller der dinge, so von mir da vorgeschriben stât an disem brief, vnd des ze mêrer sicherhait so han ich o^vch min insigel offenlich gehenkt an disen brief. Darzů han ich erbetten die erwirdigen den burgermaister vnd den rât gemainlich der stat ze V´berlingen, das si ir stat insigel zů ainer zúgnust aller vorgeschribner sache o^vch gehenkt hant an disen brief inen vnd iren erben vnd nâchkomen vnd der selben ir stat gantzlich vnscha^edlich, des o^vch wir die selben der burgermaister vnd der rât der stat ze V´berlingen offenlich veriehent mit vrkúnd dis briefs. Dis beschach vnd wart dirr brief geben ze sant Gallen an dem vorgeschriben zinstag, do von Cristus gebúrt wârent drúzehenhundert jâr vnd darnach in dem sehsvndahtzigosten jâre.

Source Fulltext: Chartularium Sangallense X, Nr. 6151, S. 344-345.