Ich^a) Jacob Růpreht, den man nemmt der Lo^ew, statamman ze sant Gallen¹ tůn kunt vnd vergich offenlich an disem brief allen den, die in sehent lesent oder ho^erent lesen, das fúr mich kam ze sant || Gallen in der stat an dem na^ehsten samstag nâch dem hailgen tag ze wihenna^ehten, do ich offenlich ze geriht sass, die erber frow fro Elsbeth Entziswillerin Cůnratz Vischs sa^eligen wilunt burgers || ze sant Gallen êlichi wirtinne vnd offnote da vor mir in gerihte mit irem fúrsprechen, si hêtti etwas vor mir in gerihte ze schaffenne, vnd batt mich mit ir fúrsprechen, das ich erfu'ri an ainer || vrtail, wie si sich stellen solti, das es kraft hêtti, do frâgte ich vrtail vmb vnd wart ertailt mit gemainer vrtail, das si ainen vogt nemen so^elt vnd ainen wîser an dem ring, welhi si wo^elt, do nam si Cůnrat den alten Kumber ze vogt vnd V^olrich den Spiesser ze wîser. Darnach offnote aber die selb fro Elsbeth Entziswillerin des obgenanten Cůnrat Vischs sa^elgen wilunt elichi wirtinne offenlich vor mir in gerihte mit irem fúrsprechen vnd sprach, das si dis nachgeschriben ia^erlich gelt an korn vnd an hu^enren von den vnd vsser den nâchgeschribnen ho^efen vnd gu^etern von dem vnd vsser dem hof ze Niderlo^ern² sehs mut vesan vnd ainen mut kernen sant Galler messes vnd ain hůn vnd von dem vnd vsser dem hof ze Loch³ bi Ramswag⁴ o^vch sehs mut vesan vnd ainen mut kernen gůtes vnd vngeua^erliches des vorgeschriben messes vnd ain hůn zins ia^erliches geltes rêdlich vnd reht verko^vfft vnd ze ko^vffenn geben hêtt dem erbern Eberhart Schirmer burger ze sant Gallen vnd sinen erben vmb fúnf vnd zwainzig pfunt vnd vmb fúnf schilling pfenning gůter vnd gen^emer Costentzer múnse, dero si gantzlich von im gewert vnd bezalt worden wa^er an den stetten, da si irn wahsenden schaden mit verkomen hêtt, vnd wa^er o^vch das selb korn vnd hu^enr gelt von den vnd vsser den vorgeschribnen ho^efen vnd gu^etern ir lehen von dem erwirdigen gotzhus ze sant Gallen vnd wo^elt o^vch dem selben Eberhart Schirmer das selb korn vnd hu^enr gelt zů sinen handen bringen vnd vêrtgen, wie reht wa^er, vnd batt mich die selb fro Elsbeth mit irem fúrsprechen, das ich erfu^eri an ainer vrtail, won der erwirdig min gna^ediger hêrre abt Cůn abt des gotzhus ze sant Gallen⁵ ze disen ziten nit ze sant Gallen wa^eri vnd aber si ietzo von rêdlicher sach vnd irtagen wegen im niht nâch varen mo^ehti, ob si dann das selb korn vnd hu^enr gelt v´t v^fsenden mo^eht bi ainem erbern man in des selben mines hêrren hant, der von ir wegen in ba^eti es lihen dem obgenanten Eberhart Schirmer. Do frâgte ich vorbenemter amman vrtail vmb vnd wart ertailt mit gemainer vrtail, das si das vorgeschriben korn vnd hu^enr gelt mit ir vnd mit des obgenanten Cůnrat Kumbers ir vogtes handen wol v^fsenden mo^eht bi ainem erbern man, der o^vch belehent wa^er von dem gotzhus ze sant Gallen, in des obgenanten mines gna^edigen herren hant vnd das der selb erber man an ir stat in bitten so^elt, das er es lihi dem obgenanten Eberhart Schirmer, vnd wenne das also bescha^ehi, das es danne wol kraft hêtt vnd haben so^elt nach dem rehten nv vnd hienach. Vnd do ze stêtt do santte die obgenant fro Elsbeth Entziswillerin des obgenanten Cůnratz Vischs sa^elgen wilunt êlichi wirtinne offenlich vor mir in gerihte frilich vnd willeklich mit bedâhtem můt mit ir vnd mit des obgenanten Cůnrat Kumbers ir vogtes handen dú vorgeschriben drú malter vesan zwen mut kernen des vorgeschribnen messes vnd zwai hu^enr ia^erklichs geltes zins ab den vnd vsser den vorgeschribnen ho^efen vnd gu^etern mit allen rehten nútzzen vnd gewonhaiten vnd mit aller zůgeho^erde bi dem beschaiden Johansen Blu^emler o^vch burger ze sant Gallen, der o^vch lêhen hatt vnd belêhent was von dem selben gotzhus ze sant Gallen, in des obgenanten mines gna^edigen hêrren abt Cv^onen abt des selben gotzhus ze sant Gallen hant, vnd das der selb Johans Blu^emler an ir stat den selben minen herren bitten sol, das er das selb korn vnd hu^enr gelt mit allen rehten vnd zůgeho^erden welli lihen dem obgenemten Eberharten Schirmer, vnd verzêh sich o^vch do die obgenant fro Elsbeth Entziswillerin des obgenanten Cůnratz Vischs sa^elgen wilunt elichi wirtinne offenlich vor mir in gerihte frilich vnd willeklich mit ir vnd mit des obgenanten Cůnrat Kumbers ir vogtes handen an min hant vnd verzihet sich mit disem brief fúr sich vnd alle ir erben des vorgeschribnen korn vnd hu^enr geltes mit aller zůgeho^erde aller aigenschaft aller lehenschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprâchen aller reht vnd rehtung, so si ald ir erben an dem zů dem vnd von des vorgeschribnen korn vnd hu^enr geltes wegen ie gehept hant ald hie nâch iemer gehaben oder gewinnen mo^ehtint, vnd das si noch ir erben noch nieman andre an ir stat noch von ir wegen den obgenanten Eberharten Schirmer noch kain sin erben noch nâchkomen von des vorgeschribnen korn vnd hu^enr geltes wegen niemer sont noch wellint ansprechen v^ftrîben bekúmberren bekrenken noch in kain wîse beswa^eren weder mit gaistlichem noch mit weltlichem geriht noch âne geriht noch mit enkainerlay ander sache âne alle geua^erde. Die vorgenemt fro Elsbeth Vischin lobte o^vch offenlich in dem geriht frilich vnd willeklich mit ir vorgenemten vogtes gůtem willen mit ir trúwe vnd lobet mit disem brief fúr sich vnd ir erben, der vorgeschriben drier malter vesan vnd zwaiier mut kernen des vorgeschribnen messes vnd zwaiier hu^enr ja^erliches geltes zins ab den vnd vsser den vorgeschriben ho^efen vnd gu^etern vnd des ko^vffs reht wer ze sine nâch des landes reht vnd den obgenanten Eberhart Schirmer vnd sin erben vnd nâchkomen darvmb ze versprechenn vnd ze versta^enne an allen stetten gegen aller ma^englichem ân allen iro schaden, wenn wâ vnd wie dich sú darvmb angesprochen geschadgot oder v^getriben werdent mit dem rehten. Vnd ist dis alles beschehen vnd vollefu^ert reht vnd rêdlich mit allen den worten werken vnd geta^eten, so nâch gewonhait vnd nâch reht darzů gehortent vnd geho^eren soltent vnd als mit gemainer vrtail ertailt wart, das es billich kraft vnd maht nv vnd hienach sol vnd mag haben. Vnd des alles ze offemm waren vrkúnde so han ich der obgenant Jacob Růpreht statamman als vorgeschriben stât min insigel nâch rehter vrtail offenlich gehenkt an disen brief, won es ertailt wart, das ich es tůn so^elt. Vnd wir die obgenanten Elsbetha Entziswillerin des obgenanten Cůnrat Vischs sa^elgen wilunt elichi wirtinne, Cůnrat der alt Kumber ir vogt vnd V^olrich Spiesser ir wîser als vorgeschriben stât veriehent offenlich ain gantz wârhait aller der dinge, so von v´ns da vorgeschriben stat an disem brief, vnd ze mêrer sicherhait der selben dinge so habent wir o^vch v´nsru' insigel gehenkt an disen brief. Dis beschach vnd wart dirr brief geben ze sant Gallen an dem vorgeschribenn samstag in dem jâre, do man von gottes gebúrt zalt drúzehenhundert jâr, ahtzig jâr vnd darnach in dem sibenden jâre.

Source Fulltext: Chartularium Sangallense X, Nr. 6161, S. 358-360.