Ich Růdolf der E^amptzer kúnd vnd vergich des offenlich mit disem brief allen, die in sehent ald ho^erent lesen, das mich die burger von sant Gallen in vank||nust vnd in ir banden hatten von ettlicher getât wegen, so ich wider sú vnd ir stat getan hatt, vnd won sú mich von miner vnd ander miner frúnd ernst||licher bett wegen vss der selben vanknust ledig gelassen hant, darumb so hab ich inen offenlich vnd vnbetwungenlich gesworn ainen gelerten aid zů den || hailgen, das ich von der vorgeschribnen vanknust wegen ir vnd der selben ir stat ze sant Gallen vnd darnach aller dero, die zů der selben vanknust râtent ald helffent gewesen sint in kain wîs, si sien burger ze sant Gallen oder nit, gůt vnd gantz frúnd sin sol vnd in darumb alle min herren frúnd vnd gesellen vnuerzogenlich ze frúnden gewinnen sol, ân all geua^erd, vnd ze mêrer vnd besser sicherhait hab ich erbetten den fromen Frik den Horwer vom Ror¹, dz der durch minen willen mit mir o^vch den selben burgern vnd ir stat ze sant Gallen offenlich vnd vnbetwungenlich ainen gelerten aid gesworn hât zů den hailgen. Bescha^eh, das ich ald der selb Frik Horwer nu oder hernach dehainest geinrot wurdin, das dehain min herr frúnd oder geselle von der vorgeschribnen vanknust wegen der vorgenemten burger gemainlich ald ir stat ze sant Gallen ald dehaines, der zů der vorgeschribnen vanknust râtent ald helffent was, nit frúnd sin wo^elt, als dik ich vnd der egenemt Frik des innen wurdint vnd als bald, so sol ich vnd der selb Frik bi den obgenanten geswornen aiden, die wir darumb gesworn haben, vnuerzogenlich vnd vngemant vns bald mit vnser selbs lip antwurten gen sant Gallen in die stat vngeuârlich vnd súllen niemer vss der selben stat keren, der selb min herr frúnd oder geselle sie dann der vorgenemten burger vnd der stat ze sant Gallen vnd aller dero, die zů der vorgeschribnen vanknust sint râtent ald helffent gewesen, luter vnd gůt frúnd worden, ân alle geua^erd. Es ist o^vch berett, wa^er das die egenemten burger von sant Gallen nu ald hernach erfu^erint, das dehain min herre frúnd ald geselle von der vorgeschribnen vanknust wegen ir vnd ir stat vient wa^er vnd nit frúnd darumb sin wo^elt, als vorbeschaiden ist, als dik sú das erfu^erint vnd wie dik ich vnd der obgenant Frik darumb von in ermant werdent ze hus ze hof ald vnder o^vgen, so súllen wir baid vnuerzogenlich werben vnd schaffen, das der selb oder die selben, darvmb wir ermant werdent, der egenemten burger vnd ir stat ze sant Gallen vnd aller dero, die zů der obgeschribnen vanknust râtent ald helffent sint gewesen, gantz vnd gůt frúnd worden sient, ân all geua^erd, oder wir súllen vns baid bi den obgenanten geswornen aiden, ob wir in landes sien, nach der manung inrent den na^ehsten aht tagen antwurten gen sant Gallen in die stat ân geua^erd vnd darûs niemer keren, der selb oder die selben, darumb wir sien gemant, sient der obgenanten burger vnd ir stat ze sant Gallen vnd aller dero, die zů der vorgeschribnen vanknust gerâten ald geholffen hant, lûter vnd gůt frúnd worden ân geua^erde, es wa^ere dann, das vns der rât ze sant Gallen tag ga^eb, die mugen wir wol haben vnsren aiden vnscha^edlich. O^vch ist berett, wa^er das ich vnd der obgenant Frik vngeuârlich in landes nit wa^erint, wenne das wa^er, so sol man vns nit manen ze hus noch ze hof, wenne wir aber in landes sien, so mag vns der rât ze sant Gallen baid ald ainwedern, der dann in landes ist, wol manen ze hus ze hof ald vnder o^vgen, als vor ist beschaiden vnd als dik ez ze schulden ka^em. Wenne o^vch ich ald der egenemt Frik von todes wegen ab gangen wa^er, so sol der ander, der dannoht lebt, von der vorgeschribnen sache wegen dem rât ald den besorgern der stat ze sant Gallen, ob nit râtes wa^er, hafft vnd gebunden sin in gelicher wîs, als ob wir baid lebtint vnd als vor ist beschaiden. Vnd ze ainer wârhait aller der vorgeschribnen dinge vnd gedinge, das dú nu vnd hienach wâr vnd sta^et behalten werdent, so han ich der vorbenemt Růdolf der E^amptzer min insigel gehenkt an disen brief. Ich der obgenant Frik Horwer vergich offenlich an disem brief, das alles das wâr ist, das von mir an disem brief da vorgeschriben stât, vnd des ze mêrer sicherhait so han ich o^vch min insigel gehenkt an disen brief, wâr vnd sta^et ze lâssenn alles, das von mir da vorgeschriben ist. Dirr brief ist geben ze sant Gallen an dem na^ehsten mentag nach aller hailgen tag, do man von Cristus geburt zalt drúzehenhundert jar, sechszig jâr vnd darnach in dem vierden jâre.

Source Fulltext: Chartularium Sangallense VIII, Nr. 4966, S. 158-159.