Ich^a) Johans Kaltisen burger ze sant Gallen kúnd vnd vergiche des offenlich mit disem brieue allen den, die in sehent ald ho^erent lesen, das mir || die ersamen der burgermaister, der amman vnd der rât der stat ze sant Gallen von miner ernstlicher bett wegen gegunnen hant ain || berffritt ze buwenn vnd ze machenn vor der stat ze sant Gallen bi sant Lienhart¹, vnd darumb, das das selb berffritt inen vnd iren nach||komen vnd der selben ir stat ze sant Gallen vnscha^edlich sie vnd belibe, darumb so han ich inen ze merer vnd ze bêsser sicherhait offenlich vnd vnbetwungenlich gesworn ainen gelerten aide ze den hailgen vnd hab o^vch alle min erben vnd nachkomen sunderlich alle die, in der hant vnd gewalt das selb berffritt iemer stât vnd komen ist, bi dem selben geswornen aide vnd mit disem brief darzů gebunden, also das wir noch ieman von vnsren wegen nu noch hernach mit dem selben berffritt nit tůn noch werben súllen, das inen ald ir stat ze sant Gallen scha^edlich ald wider sie, in kain wîs ân alle geua^erd, vnd das wir noch ieman von vnsren wegen noch an vnser stat das selb vorgeschriben berffritt nu noch hernach nieman fu^egen schaffen lihen versetzzen noch ze ko^vffenn geben súllen, ez bescheh dann mit dez merentails des rates ald, ob nit râtes ze sant Gallen wa^er, mit der besorger ald wie die genant wa^erin, die danne von der burger wegen gewaltig ze sant Gallen wa^erint, gůtem willen gunst vnd vrlob. Ich noch dekain min erben vnd nachkomen noch ieman von vnsren wegen noch an vnser stat súllen o^vch nu noch^b) hernach bi dem selben aide nit werben mit dehainen sachen an vnsern herren den kayser, der ietz ist, ald Ro^emschen kúng oder kayser, die hernach werdent, noch an dekain ander hêrschafft, si sien gaistlich oder weltlich, fúrsten ald herren, das das selb vorgeschriben berffritt gefriiet werde. Wir noch ieman von vnsren wegen súllen o^vch das selb berffritt mit murenn nit hoher buwen danne ez ietz ist, noch twingolf noch graben darumb nit schlahen noch machen won mit des egenemten merentails des râtes ald der besorger der stat ze sant Gallen gůtem willen vnd gunst, als vor ist beschaiden. Wa^er o^vch, das dehain burger von sant Gallen ald gast, die wider den vorbenemten burgern von sant Gallen gemainlich oder wider dehainem sunderbar ald wider der stat ze sant Gallen iht ta^etint ald getan hettint, zůtz vns kêrtint vff das vorgeschriben berffritt vnd wir die daruff husetint vnd enthieltint, alz dik das bescha^eh, wenne dann ie der vorgenemt rât ald die besorger der vorgenemten stat ze sant Gallen ald der mêrtail vnder in vns darumb enbietent vnd ermanent ze hus ze hof ald vnder o^vgen, so súllen wir dann vnuerzogenlich den selben burgern vnd gesten endelich vrlob geben vnd sú nit fúrbass hûsen noch enthalten, vnd so^ellin o^vch dis alles sta^et haben bi dem obgenanten geswornen aide ân all geua^erde. Vnd ze ainem wâren offenn vrkúnd aller diser vorgeschribnen dinge, das dú wâr vnd sta^et behalten werdent, so han ich der obgenant Johans Kaltisen min aigen insigel fúr mich vnd fúr alle min erben vnd nachkomen gehenkt an disen brief. Der geben ist ze sant Gallen an dem na^ehsten me^antag vor sant Gallen tag in dem jâr, do man von Cristus geburt zalt drúzehenhundert jar, sechszig jar vnd darnach in dem vierden jâre.

Source Fulltext: Chartularium Sangallense VIII, Nr. 4960, S. 154.