Allen^a) den, die disen brief ansehent lesent oder ho^erent lesen, kúnde ich V^olrich Rúsch von Roschach¹ vnd vergich offenlich mit disem brief, won mich die fromen lút der burgermaister vnd die || ra^et ze sant Gallen durch min vnd miner frúnd bett vss der vanknust ledig gelassen hant, als si mich in ir banden hattent von des totschlags wegen, als der jung Go^esswin sa^elig in ir stat || liblos getan wart, darumb so han ich gelopt mit miner trúwe vnd darnach willeklich vngebunden vnd vngeuangen gesworn ainen ait zů den hailgen mit gelerten worten vnd mit v^fge||habnen vingern, das ich der selben des burgermaisters des rates aller burger von sant Gallen vnd aller dero, die an der selben vanknust dehain schuld in dehain wis gehept hant, luter vnd gůt frúnd sin sol vnd wil vnd das ich die selben getat vnd vanknust niemer a^eferren noch andan sol noch wil in kain wîs. Ich han o^vch in den ait genomen vnd gesworn, das ich inen alle min frúnd ze frúnd gewinnen sol vnd wil, so verre ich iemer vermag, ân geua^erde. Wa^er aber, das ich dehainen miner frúnd nit v´berkomen mo^eht, das er frúnd sin wo^elt, so han ich in den selben ait genomen vnd gesworn, das ich mich dann vnuerzogenlich ân allen fúrzug vnd vngemant antwúrten sol vnd wil in die stat ze sant Gallen in die vanknust vnd in dú band, da ich inne lag vnd was, ê das ich darvs ledig wart, oder in a^endrú band in der selben stat, also vnd in der wîse, das min die ra^et vnd die burger gemainlich ze sant Gallen sicher vnd gewaltig sien, âne alle geua^erde. Vnd des alles ze offner warhait han ich der obgenant V^olrich Rúsch erbetten minen gna^edigen herren hern Eglolffen von Roschach² ritter, das er sin insigel gehenkt hât an disen brief fúr mich, won ich aigens insigels nit enhatt. Ich der selb Eglolff von Roschach ritter vergich o^vch an disem brief, das ich gesworn han ainen gelerten ait zů den hailgen, der vorgedahten des burgermaisters des rates vnd der burger aller gemainlich ze sant Gallen vnd aller dero, die zů der vorgeschribnen sach gehaft sint ald an der selben vanknust dehain schuld hant, gůt frúnd ze sinne vnd die vanknust niemer ze a^eferrenn in dehain wîs. Bescha^eh o^vch, das der selb kneht V^olrich Rúsch den vorgeschribenn ait iemer v´berfu^ere, davor got sie, vnd die vanknust in dehain wîs a^eferti, so han ich in den ait genomen vnd gesworn, das ich dann des selben knehtz V^olrichs Rúschen vient sin sol vnd wil vnd als ernstlich vnd als vientklich vff in stellen als die selben ra^et vnd die burger ze sant Gallen ân geua^erde. Vnd des ze merer sicherhait so han ich der selb Eglolff von Roschach ritter min insigel fúr mich vnd fúr den selben V^olrich Rúschen gehenkt an disen brief. Der ist geben ze sant Gallen an sant Oswaltz tag, do von Cristus gebúrt wârent drúzehenhundert jâr vnd darnach in dem núnvndsibentzigosten jâre.

Source Fulltext: Chartularium Sangallense IX, Nr. 5733, S. 400.