Ich^a) Johans Blârrer Gerwigs dez Blârrers burgers ze Costentz êlicher sun vndervogt || ze sant Gallen von dez hailigen Ro^emschen riches wegen tůn kunt vnd vergich offen||lich mit disem brieue allen, die in sehent lesent oder ho^erent lesen, daz fúr mich kament || ze sant Gallen in der stat an dem na^ehsten ma^entag nach dez hailigen crútzzes tag, alz ez erho^eht ward, do ich an dez richs strasse offenlich ze geriht saz, V^olrich von Huntwille¹ burger ze sant Gallen ze ainem tail vnd Hainrich Holtzzer vsser dem Rintal² ze dem andern tail, vnd staltent sich da baidenthalb offenlich vor mir vnd dem geriht mit fúrsprechen, vnd klegt da der selb V^olrich von Huntwille mit sinem fúrsprechen zv^o dem obgenanten Hainrich Holtzzer vnd sprach, daz der selb Hainrich Holtzzer dem land ain scha^edlicher man wa^eri von túbstal wegen vnd daz er ain sa^emlicher man wa^eri, daz ich von siner missetât wegen billich v´ber in rihten so^elt, vnd bat mich darumb gerihtes hin zv^o im, vnd veriach o^vch do der selb Hainrich Holtzzer offenlich vor mir, do er an dem geriht vngebunden stůnd, daz er vnd etlich mêr, die im dez hulffent, ain panzer rôplich genomen hettint, darumb mit gesamnoter vrtail ertailt ward, sid er selber vnbezwungenlich vnd vngebunden aines ro^vbes veriehen hett, daz ich in von der selben siner missetat vnd von dez gerihtes wegen dem nâchrihter beuelhen so^elt vnd daz der zwai stuk vsser sinem libe so^elt machen, also daz vnder den selben zwain stukken daz ho^vpt der minder tail sin so^elt, vnd daz die selben zwai stuk der weit vnd dem lande hinnenhin vnscha^edlich wa^erint vnd sin so^eltint. Darnach do ward nach frâge ertailt mit gemainer vrtail, bescha^ech daz ieman, wer die wa^erint, den obgenanten V^olrich von Huntwille oder ieman andre, wer die wa^erint, die an dez obgenanten Hainrich Holzers vangnust vnd an sinem tode dehain schuld hettint mit ra^eten ald mit geta^eten, vehtint an griffint oder schadgotint an iro lip oder an iro gůt, daz die selben, die daz ta^etint, in allen den schulden stan vnd sin so^eltint, alz o^vch der obgenant Hainrich Holtzzer waz vnd stůnt, do im der lip widertailt waz. Vnd ze vrkúnd der wârhait aller der vorgeschribenen dinge vnd vergiht so han ich Johans Blarrer vogt da vorgenemt von dez gerihtes wegen min insigel gehenkt an disen brief, won ez o^vch mit gemainer vrtail ertailt ward, daz ich ez tůn so^elt. Diz beschach vnd ward dirre brief geben ze sant Gallen an dem vorgeschribenen ma^entag in dem jar, do man zalt von Cristus gebúrt drúzehenhundert jâr, sibenzig jâr vnd darnach in dem sehsten jâre.

Source Fulltext: Chartularium Sangallense IX, Nr. 5533, S. 206-207.