Allen^a) den, die disen brief ansehent lesent oder ho^erent lesen, kúnd ich Eglolf von Altstetten¹ vnd vergich dez offenlich mit disem brie||ve fúr mich fúr alle min erben vnd nâchkomen von dez drittentailes wegen dez maigeramptes ze Altstetten in dem Rintal, den ich || reht vnd redlich geko^vffet han von Herman Maiger von Altstetten² minem vettern, alz die brief wol wisent, die ich darumb von im || han, bin ich darumb mit Cristopheln vnd mit Růdolf den Maigern von Altstetten³ sinen brůdern minen vettern ainer rehter gemainde lieplich vnd gu^etlich v´ber ain komen, vnd ist o^vch in der selben gemainde mit namen bedingot vnd berett, wedre vnder den vorbenemten zwain Cristopheln vnd Růdolf den Maigern von Altstetten minen vettern ab gât von todes wegen vnd verfu^er ân liberben, daz danne ietwedre vnder in zwain, der dennoht lebt vnd in lip ist, den andern erben sol an sinem tail vnd an allen sinen rehten dez vorgeschribenen maiger amptes ze Altstetten vnd daz ich noch min erben, ob ich enbin, noch nieman andre an v´nser stat noch von v´nsern wegen den, der vnder in zwain dennoht lebt, noch sin lîberben, ob er enwa^er, an dem selben drittentail dez vorgeschribenen maiger amptes ze Altstetten noch an den rehten, die der selb danne gelâssen hât, der vnder in zwain ab gangen wa^er, niht sûmen ierren bekúmberren bekrenken ansprechen noch schadgen súllent weder von tailes von gemainde von erbes noch von erbschaft wegen an gaistlichem noch ân weltlichem geriht noch ân geriht noch mit enkainer lay ander sache ân alle geua^erde. Bescha^ech aber, daz sú baid abgiengint von todes wegen vnd verfu^erint ân lîberben, so ist in der vorgeschribenen gemainde mit namen bedingot vnd berett, daz danne die selben baid tail dez vorgeschribenen maigeramptes ze Altstetten mit allen rehten nútzzen vnd gewonhaiten vnd mit aller zů geho^erde von der selben gemainde wegen gantzlich vnd gar ||
vallen sont an mich oder an min lîberben, ob ich enwa^er. Bescha^ech o^vch, daz ich ab gieng von todes wegen vnd verfu^er ân lîberben, so ist o^vch bedingot vnd berett, daz dann der selb min drittail dez vorgeschribenen maigeramptes ze Altstetten mit allen rehten nútzzen vnd gewonhaiten vnd mit aller zv^o geho^erde von der selben gemainde wegen vallen sol an die vorgenemten Cristopheln vnd Růdolf die Maiger von Altstetten gebrůder min vettern baid vnd an iro ietwedres lîberben, ob sú enwa^erint. Ez ist o^vch mit namen berett vnd bedingot, bescha^ech daz ich ald dewedre vnder den vorbenemten minen vettern oder v´nser lîberben, ob wir enwa^erint, von sinem tail vnd von sinen rehten dez vorgeschribenen maiger amptes ze Altstetten dehaines jâres gân vnd die versetzzen oder verko^vffen wo^elt, daz der danne den andern zwain vnder v´ns gemaindern den selben sinen tail vnd sinú reht dez vorgeschribenen maiger amptes dez ersten vail bieten vnd vor ma^englichem versetzzen oder ze ko^vffenn geben sol, alz danne zitlich vnd beschaidenlich ist, ân alle geua^erde. Wa^er aber, daz wir sú danne niht ko^vffen oder verphenden wo^eltint ald mo^ehtint, so mag der selb, der vnder v´ns danne den selben sinen tail versetzzen oder verko^vffen wo^elt, den selben sinen tail vnd sinú reht dez vorgeschribenen maiger amptes wol versetzzen oder ze ko^vffenn geben, wem er wil, vnd súllent wir in danne dar an niht sûmen noch ierren mit Worten noch mit werken noch mit dehainen andern sachen ân alle geua^erde. Vnd ze ainem waren vrkúnde vnd gantzzer sicherhait aller der vorgeschribenen dinge vnd gedinge so han ich Eglolf von Altstetten da vorgenemt fúr mich vnd alle min erben min insigel gehenkt an disen brief. Der geben ist ze sant Gallen in der stat an dem na^ehsten fritag nâch sant Mathyas tag dez zwelfbotten in dem jâr, do von Cristus gebúrt wârent drúzehenhundert jâr, sibenzig jâr vnd darnach in dem^b)

Source Fulltext: Chartularium Sangallense IX, Nr. 5399, S. 71-72.