Ich Albreht von Bussnang¹ friie vnd ritter vergih vnd tůn kund mit disem brief fúr || mich vnd alle min erben allen, die in ansehent lesent oder ho^erent lesen, dz ich mit || dem erwirdigen herren abt Georien von gottes gnâden abt des gotzhus ze || sant Gallen² lieplich vnd gu^etlich verriht bin vmb alle die sto^ess vnd missehellung, so ich mit im gehept han von der frowen wegen, die man nemmet die Swa^erzin, die min vnd miner brůder aigen was, vnd besunder von des lipdinges wegen, so ir min vorgenemter herre geben hatte, also dz mich min vorgenemter herre des selben lipdinges gar vnd gantzlich nach ir tod gewert vnd bezalt hat, alz vil als mich angehort ze nemenn. Darumb so sagen vnd tůn den vorgenemten minen herren vnd das vorgeschriben gotzhus vmb die sach vnd vmb das lipding fúr mich vnd alle min erben ledig vnd los mit disem brief. Vnd des ze vrkúnd han ich min insigel gehenket an disen brief. Der geben ist ze Strussberg³ an dem na^ehsten ma^entag nach sant Mathyas tag, do man zalt von gottes gebúrt drúzehenhundert jar vnd darnach in dem vier vnd sibentzigosten jar.

Source Fulltext: Chartularium Sangallense IX, Nr. 5398, S. 71.