Allen, die disen brief ansehent, lesent oder ho^erent lesen, tůn ich Hainrich von Swanningen || ritter lantvogt in Obren Swâben¹ kunt vnd vergih offenlich an disem brieue, das ich || mit gůter vorbetrahtunge vnd beschaidenhait mit dem êrwirdigen herren abt Herman || von gottes gnaden des gotzhus ze sante Gallen² v´berain komen bin von mines herren des kaysers wegen, das ich in vnd sin nahkomen der dienste, die er gelobt het ze tu^enne mit der vesti ze Blattun³, gantzlichen erlassen han, darvmb das er dem von A^emptz⁴ hundert march silbers geben hat, das er minem herren dem kayser die vesti ze A^emptz vf tůn sol fúr die vesti ze Blattun. Ich han im ouch gelobt an mines herren des kaysers stat, das min herre der kayser mit den grauen von Veltkylch⁵ vmb die sto^esse, die er mit in het, kain rihtunge nemen sol, ê das dem vorgenanten abt Herman ald sinen nahkomen, ob er enist, ain reht wideruert von herr Burkarten von Ramswâg⁶ vmb die vesti ze Blattun, dú sin burgsa^esse ist von dem gotzhus ze sante Gallen, die er im nút a^entw|rten wolt⁷, vnd vmb lút vnd vmb dú gu^eter, dú zů dem selben burgsa^esse geho^erent. Ich vergih ouch, das ich dem vorgenanten abt Herman vnd sinen nahkomen, ob er enist, von mines herren des kaysers wegen beholfen sol sin gegen dem vorgenanten herr Burkarten von Ramswag, vntz das im ain reht von im wideruert. Vnd ze ainem wâren v´rkúnde vnd ze ainer sta^etun sicherhait der vorgeschriben dinge henk ich min insigel an disen brief. Der geben ward ze Lindow⁸ in der stat, do man zalt von gottes geburt drúzehundert jâr, viertzeg jâr, darnah in dem fúnften jâre, an dem na^ehsten samstag vor aller hailgen tage.

Source Fulltext: Chartularium Sangallense VI, Nr. 3954, S. 492-493.