Allen, die disen gegenwúrtigen brief ansehent alder ho^erent lesen, kvnde ich her Johans von Haidelberg¹ ritter vnd || vergihe des offenlich an disem brief, das ich willeclich vnd mit gůter vorbetrahtvnge nach miner gůter frv´nde vnd ander erber || lúte rate dem beschaiden manne Steffan von Rogwile² burger ze Costentz vnd sinen erben habe ze koffent geben || reht vnd redelich vnd eweclich min vogtye ze dem Oberen Svmbri³, dv´ min lehen was von dem bistůme ze Costentz vnd jargelichs giltet ze zins vier pfvnt vnd zwelf schilling pfenning Costentzer mv´ns vnd sehs stuk an korn Costentzer messe vnd ie dv´ ffúrstat ain vasnaht hůn, vnd swas zů der selben vogtye ho^ert, es sie mit wasen, mit zwi, mit waide, mit holtz, mit velde, mit wisen, mit a^ekkern, mit wasser, mit wasserlaiti, mit wegen, mit stegen, mit abweg, mit gerihten, mit aller ehafti, mit twingen, mit ba^ennen, mit gewaltsami, mit aller gewonhait, mit allen nútzen vnd mit allen rehten, gesůchs vnd vngesůchs, benent ald vnbenent, als dv´ selb vogtye an mich komen vnd braht ist vnd als ich si gehebt vnd genossen hab her vntz an disen húttigen tag, also hab och ich dem selben Steffan von Rogwile vnd sinen erben die selben vogtye ze Obern Svmbri vnd das vorgenante^b) gelte, das si ja^ergelichs giltet, ze koffent geben vmb hvndert pfvnt pfenninge Costentzer mv´ns, vnd bin och der gar vnd ga^entzelich von im gewert vnd sint in minen redelichen nûtz komen vnd bekert, als ich vergihe an disem brief, vnd hab im och die vorgenanten vogtye vnd den zins, den dv´ vogtye ja^ergelichs giltet^c), mit den rehten, so da vorgeschriben stat, gefertigot vnd vfgeben an des erwirdigen herren hant hern Dyethelmes von Stainegge thůmprobstes ze Costentz⁴, der ietz allicher pfleger des bistůmes ze Costentz ist, vnd hab mich darv´ber verzigen vnd verzihe mich an disem brief fúr mich vnd fúr alle min erben vnd nachkomen gen dem vorgenanten Steffan von Rogwille vnd gen allen sinen erben vnd nachkomen an der vorgenanten vogtye vnd an den zinsen, die dv´ selbe vogtye giltet, vnd swas darzů ho^ert, aller aigenschaft, aller lehenhaft^d), aller vordervnge, aller ansprach, alles schirmes, alles vszugs vnd aller hilf gaischelichs vnd weltlichs gerihts, da mit ich ald kain min erbe vnd nachkomen ald ieman andre von v´nseren wegen die vorgenanten vogtye ald die zins, die dv´ selbe vogtye giltet, kv´ndin ald mo^ehtin angesprechen, vnd wa^er, das die selben vogtye ald den zins, den si giltet, ieman anspra^eche fúr aigen ald fúr lehen, des so^elin ich vnd min erben in vnd sin erben verstan vnd versprechen vnd des ir reht wern sin gen manlichem nach reht anê geuerde. Vnd ze warem vnd offeme vrkvnd vnd sta^eter sicherhait aller dirre vorgeschriben dinge gib ich der vorgenant her Johans von Haidelberg fúr mich vnd fúr alle min erben vnd nachkomen dem selben Steffan von Rogwile vnd allen sinen erben vnd nachkomen darv´ber disen brief mit minem aigen insigel besigelten. Der brief ist ze Costentz geben, do man von Cristes gebúrte zalte drv´zehen hvndert jar, darnach in dem fv´nf vnd vierzigosten jar, an sant Oswaldes abende.

Source Fulltext: Chartularium Sangallense VI, Nr. 3943, S. 483-484.