Ich her V^olr. von Sax¹ ritter kunde vnd vergich offenlich an disem briefe allen dien, die in sechent oder ho^erent lesen, das ich willeklich vnd gerne vnd mit bedachtem můte han verko^vffet || dien edelen herren grauen Frider. vnd grauen Diethelm von Toggenburg² gebrůdern die Wildenburg³ vnd alles das, das ich hatte von der alten mark, du enzwischent der Vorer gu^ote vnd || der Hiltinge gůte lit, gegen der burg hin vs ist wider die Zaphenden Muli⁴, mit allem rechte, es sien lute oder gůt, holz||
oder velt, wunne oder weide, wasser wase oder zwi ald swie alle die || nuzze geheissen sint, die dar zů ho^erent an alpen ald keinem dinge, vnd lassen su des in nuzlich gewer mit allem rechte vnd rechtunge, genemter vnd vngenemter, gesůchter vnd vngesůchter, so wir oder vnser vordren es hatten ald an ir vatter⁵ brachton, der es von mir emals ko^vfte⁶. Dar zů so ist o^vch gedinget, swas ehofstet in dem selben ieze genanden gůte lit, da sunt die lute, swa die gesessen sint, in ho^eren vnd wider dar ziehen, vnd ist aber gedinget, swa die selben lute gůt hant vnder minem gůte vnd in miner gewalt, dem sol iegliches, es sient frowen oder man, na sůchen vnd sol mir da von keines dienstes gebunden sin von vogtei an sturen an vellen ald an gelesden ald an keinen dingen, an dů guter, du vnder mir ligent, du zinsber sint, du sunt mir gewonlich zinse geben, als su her gestanden sint, vnd anders nicht. Es ist o^vch gedinget, swa vnz her ein man gewibet hat in minem gůte ald miner gewalt, du sol o^vch dem man nach ho^eren vnansprechig. Vnd hant dar vmb von inen enphangen sechshundert march lo^etiges Silbers, zwenzig march minra, vnd zehen phunt, vnd hant die verkeret in vnsern gůten nuz, vnd da von so enzuch ich mich vnd alle min erben gegen dien iezegenanden herren vnd ir erben aller der ansprach vnd alles schirmes geistliches vnd weltliches gerichtes, so wir iemer gewunnen mugen vnd gesůch^a). Vnd das dis alles war vnd stete belibe vnd an allen kieg^b) nu vnd her nach bi vns vnd vnseren nakomen, so gib ich der vorgenande her V^olr. von Sax disen brief besigelt offenlich mit minem ingesigel ze merer Sicherheit aller dirre vorgeschribener dinge. Dis beschach vnd wurden dir ko^vf||
vnd dise tegding vberein bracht vor der Wildenburg vf der Sewise⁷, do ze gegen waren dise gezuge, her Joh(an)s vnd her Amor von Luterberg⁸ gebrůder vnd beide ritter, her Joh(an)s von Lindenberg⁹ ritter, Heinzo der amman von Veltkilch¹⁰, Ebline von Rangwile¹¹, Berchtold von Wittenwil¹² schultheizo ze Liechtensteig¹³, Heinr. ab dem Hus, Růd. von Hinderburg¹⁴, Heinr. von||
Wiezinkon¹⁵, Heinr. Senphli, Berchtold der Wengner vnd ander erber lute genage^c), vnd beschach dis vnd wart dirre brief gegeben, do man zalte von gottes geburte druzechen hundert iar vnd dar nach in dem zwenzgosten^d) iare an dem nechsten zinstage nach sant Othmars tage.

Source Fulltext: Chartularium Sangallense V, Nr. 3111, S. 399-400.