Allen den, die disen brief sehent lesent oder ho^erent lesen, kúnd ich Marquart Vo^eli burger ze sant Gallen vnd vergich offenlich mit disem || brieue fúr mich vnd alle min erben, daz die beschaiden fro^vw Adelhait, Cůnratz dez Frido^vwers sa^elgen êlichi tohter, V^elis Dietrichs von || Bernang¹ êlichi wirtinne, vnd Ma^ehthilt ir tohter, die min lehen wârent von dem gotzhus ze sant Gallen, sich selber mit lîp vnd mit || gůt vnd mit allen rehten von mir reht vnd redlich geko^vffet hant an daz vorbenemt gotzhus ze sant Gallen vmb fúnf pfunt pfenning gůter vnd gena^emer Costentzzer múnse, der ich gantzlich vnd gar von in gewert bin vnd enpfangen han vnd an minen offenn nutz bekêrt. Die vorgenemten Adelhaiten vnd Ma^ehthilten ir tohter han ich o^vch willeklich vnd frilich mit lîp vnd mit gůt vnd mit allen rehten vnd ansprâchen, so ich zů in hatt, gantzlich vnd gar vf geben an dez êrwirdigen mines gna^edigen herren hant von gottes gnâden abt Georien abt dez gotzhus ze sant Gallen² zů sinen vnd zů dez selben gotzhus handen, also vnd in dem rehten, daz die vorgenemt Adelhait, V^elis Dietrichs elichi wirtinne, vnd Ma^ehthilt ir tohter vnd a^ellú dú kint tohtren vnd knaben, die sie hinnenhin gewinnet, mit lîp vnd mit gůt vnd mit allen rehten hinnenhin an daz vorgenemt gotzhus geho^eren vnd dez aigen sin sont. Ich han mich o^vch willeklich verzigen vnd verzieh mich mit disem brieue gantzlich vnd gar fúr mich vnd alle min erben gen dem obgenanten minem herren abt Georien gen allen sinen nâchkomen vnd gen dem vorgenemten gotzhus ze sant Gallen aller der reht vordrung vnd ansprâchen, so ich oder min erben zů den obgenanten Adelhaiten Dietrichinun vnd zů Ma^ehthilten ir tohter ie gehattent ald iemer zů in gewinnen ald gehaben mo^ehtint von aigenschaft ald von lêhens wegen. Darzů so han ich dem vorbenemten minem herren abt Georien gelobt mit miner trúwe, daz ich vnd min erben, ob ich enwa^er, sin vnd siner nâchkomen vnd dez vorbenemten gotzhus ze sant Gallen vmb die vorgenemten Adelhaiten Dietrichinun vnd Ma^ehthilten ir tohter vnd vmb a^ellú dú kint, die noch von ir koment, reht wern sin súllent nâch reht gen ma^enlichem an gaistlichem vnd an weltlichem geriht vnd an allen stetten, wâ vnd wenn ald wie dik sú dez bedurffent vnd nôtdurftig sint. Vnd ist diz alles also beschehen mit Worten vnd mit werken, als ez kraft hatt vnd haben sol nû vnd o^vch hie nâch. Vnd dez ze ainer sta^etun sicherhait aller der vorgeschribenen dinge so han ich Marquart Vo^eli da vorgenemt fúr mich vnd alle min erben min insigel gehenkt an disen brief. Der geben ist ze sant Gallen an der na^ehsten mitwûchen nach dez hailigen crútzzes tag, als ez funden ward, in dem jâr, do man zalt von gottes gebúrt drúzehenhundert jâr, sehszig jâr vnd darnach in dem andern jâre.

Source Fulltext: Chartularium Sangallense VIII, Nr. 4804, S. 25-26.