Allen^a) den, die disen brief ansehent lesent oder ho^errent lesen, tůn ich Růdolf von Rosenberg von || Zukkenriet¹ ritter kund vnd vergich offenlich mit disem^b), das Johans Tegan vnd Jacob sin || elicher sun sesshafft ze Wirtzburg², die min aigen warent von dem lib, sich selber mit lib || vnd mit gůt aines rehten ewigen vnd vnwiderru^effenden ko^vffs von mir geko^vfft hand an das erwirdig gotzhus ze sant Gallen, dannan si o^vch min lehen warent, vmb vierzehen pfund gůter haller, der ich och von inen gantzlich gewert vnd bezalt bin, vnd han den selben Johansen Tegan vnd Jacob sinen elichen sun mit lib vnd mit gůt vnd mit allen rehten dem ho^vhwirdigen fúrsten Cůnen von gottes genaden abt des gotzhus ze sant Gallen³ minem gna^edigen herren an sin hand zů des vorgenanten sines gotzhus handen vff geben vnd geuertgot vnd zů sinen handen braht vnd in liplich gewer gesetzt, als reht sitt vnd gewonlich was, vnd also dz si nû hinnan zů dem vorgenanten gotzhus ze sant Gallen mit lib vnd gůt gentzlich geho^erren sond, vnd han mich darv´ber verzigen vnd verzih mich o^vch mit disem brief fúr mich vnd all min erben gen minem vorgenanten herren abt Cůn gen sinen nahkomen vnd gen dem selben gotzhus ze sant Gallen vnd gen den vorgenanten Johansen Tegan vnd Jacob sinem elichen sun vnd allen iren kinden, die si ietz hand oder noch gewinnent in kúnftigen ziten, aller aigenschafft aller lehenschafft aller gewer aller kuntschafft aller besatzzung aller zúgnust lut vnd brief, die ich ietz han oder in kunftigen^c) von mir oder minen erben funden werden, alles gaistlichen vnd weltlichen gerihtes aller vordrung vnd ansprach, so ich ald min erben zů den vorgenanten Johansen Tegan vnd Jacob sinem sun vnd zů ir lib vnd gůt iemer me gehaben vnd gewinnen mo^ehtin von dehainr lay sach wegen, a^vn geuerd. Ich han och gelopt vnd loban mit disem brief fúr mich vnd all min erben, der vorgenanten Johansen Tegans vnd Jacob sines elichen sun vnd des ko^vffs reht wer ze sind nah reht fúr allerma^engklichs irrung vnd ansprach gaistlicher vnd weltlicher lút vnd gerihtz an allen den stetten, da es inen notdurftig ist, a^vn geuerd. Vnd des ze offnem vnd warem vrkúnd han ich Růdolf von Rosenberg von Zukkenriet ritter min aigen insigel offenlich gehenkt an disen brief. Der geben ist in dem jar, do man zalt von Cristi gebúrt tusent drúhundert ahtzig vnd aht jar.

Source Fulltext: Chartularium Sangallense X, Nr. 6301, S. 545-546.