Bertholdus dei gratia abbas¹, Manegoldus decanus², Albertus prepositus³ totusque conventus monasterii sancti Galli dilecto in Christo Ysaac sacerdoti capelle sancti Os||waldi⁴ suisque successoribus in perpetuum. Cum capella sancti Oswaldi, cui prees, certis possessionibus dotata non existat, sacerdote tantum, qui pro tempore prefuit ipsi, hactenus || decem triciti^a) modios ab abbate totidemque a decano sive cellerario monasterii nostri annuatim prestolante ac interdum minus aut omnino nichil ab eis percipiente, nos priorum || temporum inperfectionem quo ad hoc stipendium volentes reducere ad perfectum, predictorum viginti modiorum prestatione abolita penitus et detracta, utpote que minus sufficiens et non satis certa competentis beneficii vicem supplere non potuit, prebendam forinsecam tibi Ysaac nomine capelle sancti Oswaldi supradicte tuisque successoribus in perpetuum statuto inconvellibili omnium nostrum assensu et voluntate edito in beneficium deputamus, recipiendam de nostro refectorio, sicut et alii clerici ecclesiarum forinsecarum scilicet sancti Laurentii⁵, sancti Magni⁶, sancti Leonardi⁷ et sancte Fidis⁸ suas prebendas recipere consueverunt. Cum quibus etiam clericis omnibus diebus festivis, quos in albis agere solemus, omnibus diebus dominicis, omnibus processionibus tam diurnis quam vespertinis nobiscum teneris officiare, iisdem diebus omnibus a choro veniens facturus prandium cum decano, exceptis dumtaxat privatorum dierum processionibus, quas facimus intra monasterium nostrum, ad quas se talis prandii refectio non extendit. Idem etiam decanus sive cellerarius ter in anno ad minutiones suas te vocare debet et singulis minutionibus reficere per tres dies. Porro quia ubi est emolumentum, ibi est et honus collocandum, sicut in predicti novatione statuti tua non ambigitur meliorata conditio, ita non incongrue in supportandis absentium fratrum nostrorum vicibus te tuosque successores volumus honerari, ut videlicet quandocumque prior noster in absentia fratrum choro nostro te adesse postulaverit, venire debeas et horis, quibus ipse tibi iniunxerit, interesse. Super aliis vero sicut antecessores nostri noscuntur statuisse, ita et nos duximus innovandum, quod videlicet memoratus decanus noster sive cellerarius ex officio suo capellam sancti Oswaldi supradictam, cum vacaverit, conferre debeat sacerdoti dumtaxat in ipsa residenti, tectum ipsius reficere et luminare nocturnum ministrare. Denique successores tui singulis annis in tuo anniversario de domo tua, quam capelle ipsi perpetuo iure donasti, fratribus nostris ciatum unum dabunt. Et hoc te ita disposuisse confiteris et presentibus inseri postulas, renuntiando omnibus ordinationibus ante habitis et scriptis exinde confectis, quocumque munimine apparuerint roborata. In quorum omnium testimonium et robur perpetuo valiturum duo paria eiusdem tenoris fieri et sigillis nostris fecimus roborari, uno tibi nomine ipsius capelle tradito, reliquo vero in nostro armario remanente⁹. Act. anno domini M.CCLVI. V. idus april. pontificatus domini Alexandri pape IIII^ti, anno secundo, imperio Romano vacante, regiminis vero nostri anno duodecimo.

Source Fulltext: Chartularium Sangallense III, Nr. 1546, S. 403-404.