Allen, die disen brief ansehent, lesent oder ho^erent lesen, kúndin wir Eberhart vnd Arnolt ritter || vnd V^olrich von Búrglon¹ fryien alle gebrůder vnd veriehen offenlich an disem brief fúr v´ns || vnd fúr alle v´nser erben, das wir die burg ze Singenberg² vnd alles, das dar zů geho^eret, von dem || erwirdigen herren von gottes gnaden abt Herman des gotzhus ze sant Gallen³ verpfendet haben vmbe sehs schilling vnd vmbe vier vnd drisseg pfunt vnd vmb hundert pfunt pfenning Costentzer múns, vnd wenne wir ald v´nser nahkomen des vorgenemten gůtes von dem vorgenemten v´nsrem herren^a) abt Herman ald von sinen nahkomen geweret werden, so so^elin wir in die selben burg vnd alles, das darzů geho^eret, wider geben vnd gantzlich ledig lâssen ân alle wider red vnd an fúrzug vnd so^elin ouch da lassen zehen malter vesan vnd zehen malter habern Bischofceller messes⁴ ze sâmen. Wa^er aber, das wir des vorgenemten v´nsers gůtes dehaines jares gewert wrdin nah sant Johanns tag des Tôuffers, so son v´ns doch die nútz von den lúten vnd von den gu^etern, die zů der burg ze Singenberg geho^erent, des jares gantzlich geuallen sin. Wir veriehen ouch, das wir mit gůter vorbetrahtung willeclich gesworn haben ainen geleiten ait ze den hailigen, dem vorgenemten v´nsrem herren abt Herman mit der vorgenemten burg ze Singenberg getrúlich ze wartenne, alle die wil er lebt, vnd in în vnd vˆs ze lassenne, er kom mit vil oder mit lútzel gesindes, gewâffent ald vngewâffent, ze allen sinen vnd des gotzhus no^eten ald ane nôt, ze schinpf ald ze ernst. Wa^er aber, da uor got sige, das er enwêre, so so^elin wir vnd v´nser nahkomen ainem andern ainwelligen abt oder ainem pfleger des gotzhus ze sant Gallen ald dem cappitel gemainlich, ob kain abt noch pfleger da wa^ere^b), gehorsam sin aller der vorgeschriben dinge in allem vnd vollem reht, als wir v´nsrem vorgenemten herren abt Herman ietzo gebunden sigen vnd als hie vor beschaiden ist an disem brieue. Vnd ze ainem waren vrkúnd vnd ze ainer sta^etun sicherhait aller der vorgeschriben dinge vnd ouch gedinge henken wir die vorbenemten Eberhart, Arnolt ritter vnd V^olrich von Búrglon fryien alle gebrůder v´nsrú insigel an disen brief. Der geben ward ze Búrglon, do man zalt von gottes gebúrte drúzehenhundert jâr, dar nah in dem siben vnd drisgosten jâr ze vsga^entem mayien.

Source Fulltext: Chartularium Sangallense VI, Nr. 3666, S. 262.