Ich Bartholome ze Bvrgtor der stat amman von Costentz¹ tv^on kvnt allen den, die disen gegen||würtigen brief ane sehent alder ho^erent lesen, daz her V^olrich von Gvttingen² hern Diethelmez || saeligen svn von Gvttingen³ fvr mich kam ze Costentz fvr gerihte an dem naehsten samstage || nach sant Othmarz tage vnde clagte da mit sinem fvrsprechen vnde iach, vro Îte dv Kempterin von Costentz waer sin rehte lehen von dem gotzhuse ze sant Gallen, vnde bat darvmbe gerihtes, do a^entwurte her .. .^a) der portener des vorgenanten gotzhusez von sant Gallen⁴ mit sinem fvrsprechen also, dv vorgenante vro Îte horte von des vorgenanten gotzhuses wegen an daz portenampt ze sant Gallen, des er phleger wa^ere, vnde^b) hette si braht vnde gehebt in dienestlicher gewer vntz an den tac. Do ertailt Johans der Rvhe, mo^ehte der vorgenante portener erzvgon mit zwain mannen mit dem binôft, daz si im gedienet hette, so so^elt er in der gewer beliben, vntz im si der vorgenante her V^olr. von Gvttingen abe besazte⁵. Do ertailet her Albreht von Clingenberch⁶ ain ritter, sit si baide gêste wa^erint vnde die bvrger nvtwol o^vch wissen mo^ehten, wie den herron vsserthalp der stat ir lvte dienent, mo^ehte der vorgenante portener mit zwain ereba^eren mannen mit ir aiden fvrbringen, daz si im gedienet hette, daz er denne bi der gewêr beliben solte, vnz si im der vorgenante her V^olr. ab besazte. Dv vrtailde des von Clingenberch wart dv minre vor gerihte, die selben vrtailde zôch Hainrich Meldeli⁷ vor gerihte, alz reht ist, vf die phallentze ze Costentz fvr .. vogt vnde fvr .. bischof, wan si in alz reht duhte, alz im wart ertailet. Vnde daz diz wâr sie vnde sta^ete belibe, darvmbe gib ich der vorgenante Bartholome der amman min insigel an disen brief zainem waren vrkvnde alles des, so vorgeschriben stat. Dierre brief wart geben ze Costentz an dem vorgenanten samztage in dem jare, do man zalte von gottes gebvrte drvzehenhvndert jar, indict. XIIII^a.

Source Fulltext: Chartularium Sangallense V, Nr. 2515, S. 17-18.