In gottis namen amen. Wir von gottis gnadin abt Heinrich zi sante Gallin¹ kvnden allen den, die II disin brief sehint odir iemir ho^erint lesin, das Rv^odolf der schultheisse von Wile² hat gimaIIchot reht vnd^a) redilichin mit vnsir hant Adilheit sinir tohtir tohtir, du Heinriches des langin | Lo^vwin von Zukinrieht³ tohtir ist, den zehinden von des Hafiners gůte vndir dem Rodimunt⁴ bi sante Gallin vnd den wingartin zi Bernang⁵ in dem Rintal, der da heissit Kaechilis wingarte, vnd sinin hof zi Obirndorf⁶ vnd die vogteie zi Honuirst⁷ vnd sinin wingartin, der da heissit an dem Ranfte⁸ vnd lit vndir der burg zi Bernang, zi rehtim lehin, vnd hat der selbun Adilheit ubir du gu^etir, du hie gischribin sint, Johansin vnd Rv^odolfin sinis brůdirs sune Johansin saelgin des Spisers von sante Gallin zi gitruwen tragern gebin mit vnsir hant. Doch ist der vorginande hof zi Obirndorf vnd du vogteie zi Honuirst vnd der wingarte an dem Ranfte vndir der burg zi Bernang fron Gůtun des vorginandin Rv^odolfin des schultheissin wirtinne reht lipdinge, vnd ist das mit vnsir hant reht vnd redilich bischehin, vnd dauon sol si an den selben gůtirn, die wile si lept, niemir biswaerit werdin. Das abir allis, das hie gischribin stat, ganz vnd staete bilibe, so henken wir der vorginande abt Heinrich von sante Gallin vnsir insigil an disin brief zi einim staetin vrkunde. Dis bischah vnd wart dise brief gebin zi sante Gallin, do man zalte von gottis giburte druzehin hundirt jare, darnah in dem sibindin jare, an dem naehstin vritage nah sant Andres tult, da zigegin warin her Egilolf von Rosinberg⁹, her Cv^onrat von Gru^eninstein¹⁰ rittir, V^olrich Meldli¹¹, Lutholt der schenke von Landegge¹², Heinrich vnd Egilolf die Omin von Raetinberg¹³, Cv^onrat der amman von sante Gallin¹⁴, Gerwig der Peier¹⁵, Johans der Munser von sante Gallin, Heinrich, Egilolf, Cv^onrat, Albreht, Jacob vnd Cv^onrat die Plarer, Hug, Cristan, Cv^onrat vnd Hug die Vo^elin, Johans vnd Rv^odolf die Spiser, Wilderich, V^olrich sin sun, meistir V^olrich der arzat¹⁶, Walther der Meier, Johans vnd Cůnrat Arndts vnd andir bidirbe lute ginůge.

Source Fulltext: Chartularium Sangallense V, Nr. 2689, S. 141-142.