Allen dien, die disen brief iemer an gesehent alder ho^erent lesen, kunden wir von gottes genaden abt Hainrich vnd der conuent alle gemainlich des gotteshuses ze sant Gallen, das wir der vor genemt abt Hainrich mit vnser closter herron aller willen dem er gernden ritter hern V^oIrich von A^emz vnd sinem brůder Marchwart vnsers gotteshuses dienstmannen reht vnd redlich baiden vnd iro erben, sü sigen man alder vrowen, verlühen haben ze rehtem lehen aht phunt geltes Costenzer munse, als hie nah geschriben stat, zwai phunt geltes vs vnsers gotteshuses hof ze Tufenbach vnd vierdhalb phunt geltes vs vnserm hof ze Marpach vnd drithalb phunt geltes vs dem gůt in dem Mose, vnd mit dien selben aht phunden geltes vnd mit funfen vnd funfz marchen silbers Costenzer geweges do gulten wir vnd widerlaiten dien vor gena^emten hern V^olrich vnd Marchwart du gu^eter vnd die lute, die wir von inen gechofet haben vnd die hie nah geschriben stant, das gůt ze Stainital vnd das gůt an der Egge vnd die lute alle sament, die in du selben gu^eter ho^erent, ân die lute, die hinder su geuarn waren vber Rin ald in das Rintal vor dem tag, do dirre chof beschach, vnd an Arnolten vnd Růdolfen vs Stainital, die inen ansprechig waren von grauen Kraften von Toggenburg, wir haben vns och gebunden, dien vor genemten hern V^olrich vnd Marchwart vnd iro erben fur vns selben vnd fur vnser nah komen wer ze sinn der vor geschriben aht phund geltes nah reht, wir wellen o^vch, das alles das, das da vor geschriben ist, ald ie kraft hab, als ob es vor ainem rihter geschehen sige, vnd das die vor genemten hern V^olrich vnd Marchwart ald ir erben von vns alder von vnseren nachomenen an dien vor gesprochenen aht phunden geltes niemer mugen bechrenchet werden, dar vmbe so encihen wir vns alles des rehtes, so wir haben von sunder briefen alder von gemainem geschribem reht der ba^ebest alder kaiser, da mit wir su nu alder her nah bekrenchen mo^ehtin an der selben gult. Vnd das dis war sige vnd stet belibe, dar vmbe so geben wir dien vor genemten hern V^olrich vnd Marchwart disen brief besigelt mit vnsere(m)^a) insigel ze ainem steten waren vrchunde aller der dinge, so an disem brief da vor geschriben stant. Dis beschach vnd wart an disem brief verschoben ze sant Gallen, in dem jar, do man zalt von gottes geburte druzehenhundert vnd druzehen jar, an vnser vrowen tag ze der liehtmisse, da ze gegen waren die erberen gezuge, die nah geschriben stant, her Růdolf der kilchherre von Roschach, her Johans von Luterberg, Eglolf von Rosenberg, Lütolt der Schenche, Hainrich Walther von Sulzberg, Cůnrat von Luterberg vnd Amôr von Luterberg, V^olrich Meldli, Hainrich im Kilchof, Růdolf der schulthaisse von Wile vnd ander biderber luten vil, die es an warhait wissen.

Source Fulltext: Chartularium Sangallense V, Nr. 2842, S. 232-233.