Wir Hiltpolt von gotes genaden apt² des gotzhus von sant Gallen vnd aller der conuente des selben gotzhus vergiehen || und tv^oen kvnt allen den, die disen brief sehent, lesent oder ho^erent, das wir ansehen vnd angesehen haben, das her V^olrich || von Enne vnsers gotzhus probst vnd portener³ willeclich vnd go^etlich vns an vnsers gotzhus^b) stat hat lassen verkoffet^c) redlich vnd || recht die nutze vnd die zinse ze Mo^erishusen⁴, die an das porten ampt ze sant Gallen gehorten, dem spital der shiechen^d) ze Schafhusen⁵, vnd wir mit dem selben gůte vnsern vnd vnsers gotzhus grossen schaden verkamen, baidv an Juden vnd an giselschaft, vnd och das es vns vnd vnserm gotzhus besser getan was danne vermuten. Dar vmbe so geben wir apt Hiltpolt vnd aller der conuente gemainlich des vor geschriben gotzhus ze sant Gallen vnd haben geben willeclich, ainmu^oetclich vnd och mit wiser vnd gůter vorbetrachtunge vnd och wan es vnserm gotzhus besser getan ist danne vermitten, dem vor genemten hern V^olrich von Enne probst vnd portener des gotzhus ze sant Gallen alle die nutze, die wir vnd vnser gotzhus haben vnd han sulen ze Ho^echste⁶, vnd die zinse ze ainem rechten vnd werenden lipgedinge, vnd ergetzen in der go^etlichin, so er vns vnd och vnserm gotzhus an der vor geschriben getat getan hat, mit dem selben lipgedinge ze Ho^echste, das er es han vnd niessen sol, alle die wil vnd er lept, an alle wider rede, vnd wenne er enist, so sol das selbe lipgedinge ze Ho^echste, als da vor geschriben stat, wider gan vnd wider ho^eren an ainen apt vnd an ainen herren, wer der danne ist ze sant Gallen. Wir behalten och vns vnd vnserm gotzhus ze sant Gallen den kirchensatzze ze Ho^echste vnd dv gerichte ze Ho^echste vnd och vaelle vnd gelaeste ze Ho^echste, das der vor genemte her V^olrich von Enne probst vnd portener ze sant Gallen mit den allen nicht ze schaffend hat noch ze to^ende in kainen weg. Wir vergiehen och fur vns vnd fur alle vnser nachkomen, alles das, so da vor geschriben stat, war vnd staete vnd vnzerbrochen ze behaltend mit allen dingen, vnd das wir kainem apt niemmer gehorsami geloben noch to^egen, er habe staete mit vns alles, das da vor geschriben stat. Vnd ze ainer gantzer vnd staeter warhait aller der vor geschriben dinge dar vmbe so geben wir apt Hiltpolt vnd aller der conuente des gotzhus ze sant Gallen disen brief besigelten mit vnserm vnd mit vnsers conuentes insigel. Diz beschach vnd wart dirre brief geben ze sant Gallen, do man zalt von gotes geburte druzehen hundert jar vnd dar nach in dem zwai vnd zwainzegosten jar, an dem naechsten dvnrstag nach sant Margareten tag.

Source Fulltext: Chartularium Sangallense V, Nr. 3163, S. 435-436.