Wir Herman von gottes genâden abt des gotzhus ze sant Gallen¹ veriehen vnd tu^en kunt mit disem brief allen, die in ansehent lesent oder || ho^erent lesen, das fúr v´ns kam fúr geriht, do wir offenlich ze geriht sassen, V^olrich der Giel von Glatburg² kilchherre der kilchen ze || Helffatswille³, vnd offent da mit fúrsprechen, das sich Gerdrut Velin, Elisabeth ir tohter vnd Elisabeth Velin, Hainrichs des Smitz to^ehter || von Búrron⁴, die von v´ns vnd v´nserm gotzhûs sin lêhen waren, sich selber mit lip vnd mit allem irem gůt von ime vnd von sinen erben reht vnd redlich geko^vft hettin an v´ns vnd an vnser gotzhus vmbe zwai phunt vnd vmbe zwelf schilling phenning gůter Costentzer múnse, vnd wa^er o^vch der selben phenning gantzlich von inen gewert, vnd das er sú dauon v´ns vnd v´nserm gotzhus mit lip vnd mit gůt vnd mit allen rehten ûfgeben vnd vertgon wo^elt, vnd batt v´ns, das wir erfu^erent an gemainer vrtaild, won er ain kilchherre wa^er, wie er daz tůn so^elt, das er kraft hett nu vnd o^vch hernach. Das taten wir, vnd wart ertailt an gemainer vrtailt, das der selb V^olrich Giel ainen vogt nemen so^elt, wen er wo^elt, vnd mit des hant vnd mit v´nser hant das tůn so^elt. Do nam der selb V^olrich Růdolfen von Lindenberg⁵ schulthaissen ze Wil⁶ ze vogt, vnd mit des hant do gab der egenemt V^olrich Giel die vorgenemten Gerdruten, Elisabethun ir tohter vnd Elisabethun, Hainrichs des Smitz to^ehter, ledklichen frilich vnd willeklich v´ns vnd v´nserm vorgenemten gotzhus ûf mit lip mit gůt vnd mit allen rehten, so er von aigenschaft ald von lêhenschaft wegen zů inen ald zů dehainem irem gůt ie gehatt ald haben moht ald solt, also das die selben Gerdrut Velin, Elisabeth ir tohter vnd Elisabeth, Hainrichs des Smitz to^ehter, hinnenhin iemer me an das vorgeschriben gotzhus geho^erren vnd des reht aigen sin sond mit allen rehten, vnd entzehe sich darúber gen v´ns vnd gen allen v´nseren nachkomen vnd gen dem vorgenemten gotzhus mit disem brief fúr sich vnd fúr alle sin erben vnd nachkomen aller aîgenschaft, aller lêhenschaft, alles rechten gaistliches vnd weltliches gerihtes, aller vordrung vnd ansprach, so er zů den vorgenemten Gerdruten, Elisabethen ir tohter vnd Elisabethun, Hainrichs des Smitz to^ehter, zů irem lip ald zů irem gůt ald daran ie hatt ald haben moht von reht ald von gewonhait. Darzů hat v´ns der êgenemt V^olrich der Giel mit siner trúw gelopt fúr sich vnd sin erben, das er vnd sin erben, ob er enwa^er, v´nser vnd v´nser nachkomen vnd v´nsers vorgenemten gotzhus vmb die vorgenemten Gerdruten Velin, Elisabethen ir tohter vnd Elisabethun, Hainrichs des Smitz to^ehter von Búrron, reht wer sol sin nach reht vmbe den vorgeschribenn ko^vf gen menglichem an gaistlichem vnd an weltlichem gericht vnd wo wir ald v´nser nachkomen vnd das vorgeschriben gotzhus oder die vorgeschribenn lút sin bedurfent ald no^vtdurftig sint, vnd ist dis alles beschehen vnd vollefu^ert, als ez kraft hatt vnd ertailt wart von reht vnd von gewonhait. Vnd ze offenem waren vrkúnd vnd sta^eter sicherhait aller diser vorgeschribenn dinge henken wir abt Herman da vorgenemt v´nser insigel an disen brief. Wir die vorgenemten V^olrich der Giel vnd Růdolf von Lindenberg sin vogt in der vorgeschribenn sach veriehent offenlich an disem brief, das alles das wâr ist, das der vorgenemt v´nser gena^ediger herre von gottes genaden abt Herman von v´ns veriehen hat an disem brief. Vnd des ze merer sicherhait der selben dinge so haben wir o^vch v´nseri insigel gehenkt an disen brief. Der geben ist ze Wil in der stat, an dem na^ehsten zinstag vor v´nser frowen tag ze dem a^ernde, in dem jar, do man zalt von gottes gebúrt drúzehenhundert jar, fúnfzig jar vnd dar nach in dem sechsten jare.

Source Fulltext: Chartularium Sangallense VII, Nr. 4433, S. 282-283.