Wir Hainrich in dem Kilchhoue korherre ze Cur¹, Cv^onrat in dem Kilchhoue kilchherre ze Salmza² vnd^a) Johans || in dem Kilchhoue gebrv^oder, Hainrichz saelgen svn in dem Kilchhoue³, verjehent vnd kundent allen den, die discen || brief lesent oder ho^errent lesent, daz die erberen ritter her Hainrich Walther vnd her Eberhart von Sulzberg⁴ || an ir stat vnd an ir vetters hern Rv^odolfs selgen von Sulzberg⁵ kind stat dur vsern willen vnd dur vser bet vnd dur vsern nuzze vnd sunderberlichen, daz ich Hainrich in dem Kilchhoue der vorgenant in aines wehzels wise zv^o der phrv^ond ze Cur komen bin mit ir gunst vnd mit ir willen, also daz die kilch ze Golda⁶, dv von den vorgenanten von Sulzberg vnd von vs lehen ist, gefo^eget vnd gelihen ist Johansen dem Rinegger⁷ swester svn maister Hainrichz Phefferharz⁸, der e korherre ze Cur waz, da von so erkennend wir vs des vnd veriehent des an dizem brief, daz die selben ritter von Sulzberg oder ir erben, ob su enwerent, vnd her Rv^odolfz saelgen von Sulzberg kind vnd ir erben die vorgenanten kilchen ze Golda lihen sond ân vs, swenne si^b) nv ze dem nehsten mal ledig wirt^c), vnd sol inan daz nut enschaden, daz wir mit ir willen vnd mit ir gvnst gefv^eget hand die vorgenanten kilchen ze Golda dem vorgememten^d) Johansen dem Rinegger vmb den wehsel der phrv^ond ze Cur, als da vor geschriben ist. Vnd dar nach so die vorgenanten von Sulzberg ze dem nehsten mal die vorgenanten kilchvn ze Golda gelihent, so so^ellent wir vnd sv gegen an ander an vserm reht bliben als e vnd die kilchun wehzelichen lihen, vnd haigint daz ze allen haiigen gesw^orn^e) staet ze haben vnd nut da wider ze tv^enne weder mit Worten noch mit werchen noch mit hainer slaht sach. Vnd dar vber geben wir Hainrich, Johans vnd^f) Cv^onrat in dem Kilchhoue gebrv^oder den vorgenanten von Sulzberg disen brief mit vser driger^g) insigel besigelt zem waren vrkunde, als des da vor geschriben stat. Diz geschah ze sant Gallen, an dem samstag in der phingstw^ochen, do man zalt von gottes geburt druzehen hundert jar, dar nach in dem aim vnd zwainzgosten jar vnd in dem vierden jar Romer stvr jar.

Source Fulltext: Chartularium Sangallense V, Nr. 3126, S. 407-408.