Allen den, die disen brief an sehent, lesent oder ho^erent lesen, kúnd ich Herman der junger Kupferschmid burger ze Wil¹ vnd vergih offenlich an disem brief || fúr mich vnd fúr alle mine erben, dz ich mit wolbedahtem râte vnd mit gůter beschaidenhait durch miner vnd durch Vrsellun Cůnratz dez Kamerers || tohter wilunt miner elichun wirtenn sele willen abe miner wise, dú min aygen ist vnd gelegen ist ze Wîl vff Wilmatt² zw´schent der kilchun wise || vnd Eberhartz dez Trůngers wise, reht vnd redelich han gesetzet vnd geordenot, dz ich ald mine erben ald wer die wise denne inne hat vnd nússet, ja^erklich dar abe vnd da von ane fúrzug vnd ane wider rede rihten vnd geben sol am lúpriester ze Wil vier schilling pfenning gůter Costentzer múns geltes, am helfer ze Wil ain schilling pfenning geltes der selbun múns, dem^a) conuent der sa^emenung ze Wil³ an den tissche, die wile ain sa^emenung da ist, drye schilling pfenning geltes der obgenandun múns, am sigeristen ze Wîl sehs pfenning geltes der selbun múns, den veltsiechun ze Wil⁴, die wile sú da sint, ainen schilling pfennng^b) geltes der vorgescribenun múns vnd armen lúten ze Wîl ze ainer spende ainen mutt kernen geltes Wiler messes ald aber sibenthalben schilling pfennng^b) Costentzer múns ja^erklich da fúr. Vnd sol ich Herman Kupferschmid ald mine erben, ob ich enwa^er, ald wer denne die selbun wise inne hat vnd nússet, dz vorgescriben gelt alleklich vnd gar ja^erklich ane allen fúrzug rihten vnd gen an die vorgescriben stette vff den na^ehsten ma^entag nach dez hailigen crúces tag ze herbest. Vnd sol an lúpriester vnd an helfer^c) ze Wîl vff den selben ma^entag miner^b) vnd miner vorgenandun elichun wirtenn jarzit ze sant Peters kilchun⁵ ze Wil began ja^erklich mit ainer gesungenun messe ane geua^erde vnd an sigerist dz ja^erzit lúten, vnd wenn an lúpriester an dem sunnen tag der selun gedenket an der kantzel, so sol er miner vnd miner vorgenandun wirtenn selan och gedenken. So sont die vrowan in der sa^emnung v´nser jarzit vff den vorgenanden ma^entag ja^erklich began mit ainer vigilie ald mit anderm gebett, die den salter nit kunni. Vnd wa^er, dz ich ald mine erben, ob ich enwa^er, ald wer denne die wise inne het, dz vorgescriben almůsen vnd gelt vnd selgera^et ja^erklich nit gar vnd gantzlich ga^ebint vnd wertint vff dz vorgeschriben zil den lúten vnd an die stette, als vor ist gescriben, so sol an lúpriester ze Will vnd der conuent der sa^emenung ze Wil die wise dannan hin ane alle wider rede vnd ane alle bekrenknúst min vnd miner erbun besetzen vnd entzetzen vnd sont dz vorgescriben gelt vnd sele gera^et da von ja^erklich gen vnd rihten in aller wise, als vor ist gescriben, ta^etint sú dez nit, so ist das vorgescriben gelt ledeklich geuallen wider an mich vnd ane mine erben ane fúrzúg. Vnd ze merer sicherhait aller vorgescribener ding henk ich Herman der vorgenand Kupferschmid min insigel fúr mich vnd fúr mine erben an disen brief. Dis geschach vnd wart dirre brief geben ze Wil in der stat an sant Andres abent, do man zalte von gottes gebúrt drútzehenhundert jar, fúnfzig jar, dar nach in dem dritten jare.

Source Fulltext: Chartularium Sangallense VII, Nr. 4331, S. 215-216.