Wir^a) die nachgenempten Hainrich vnd Johans von Rosnegg gebrůder frien in Costentzer bystum veriehen vnd tůnt kunt || offenlich mit disem brief allen den, die in ansehent lesent oder ho^erent lesen, daz wir ansehent vnd angesehen habent || die getrúwen dankna^emen dienst, die v´ns der from Lútolt der Schenk von Landegg dik geta^vn ha^vt vnd noch getůn mag, || vnd besunder daz er v´ns geben gewert vnd bezalt ha^vt núntzig pfunt gůter vnd genemer haller, darvmb wir im den kilchensatz ze Helfentswile bi Lingenwile gelegen ze koffent geben haben, alz die brief wol wisent, die er von v´ns dar vmb ha^vt, vnd darvmb so haben wir mit gůter vorbetrahtung vnd beschaidenhait dem vorgenanten Lútolt dem Schenken vnd allen sinen erben den vorgeschribnen kilchensatz ze Helfentswile mit der widern vnd mit allen rechten nútzen vnd gewonhaiten, so dar zů vnd dar in iendert geho^ert, recht vnd redlich verlihen vnd lihent inan mit disem brief ze rechtem lehen. Wir haben och demselben Lútolt dem Schenken vnd sinen erben die gnad vnd daz recht geben vnd geta^vn fúr v´ns vnd fúr alle v´nser erben vnd nachkomen vnd tůnt vnd gebent inan mit disem brief, waz sú mit dem vorgeschribnen kilchensatz gen ieman tůn went, es sie mit lihen mit fu^egen mit machen mit versetzen ald mit verkoffen, daz wir inan des wol gunnen vnd gestatten so^ellen vnd sú dar an nit sumen noch ierren sont, doch v´nser manschaft vnd lehenschaft gen inan vnscha^edlich, a^vn alle geua^erd. Des alles vnd hierúber ze offem vrkúnd der warhait so haben wir v´nsrú insigel offenlich gehenkt an disen brief. Der geben ist an v´nsers herren fronlichams aubent, do man zalt von Cristus gebúrt drúzehenhundert jar, ahtzig iar, dar nach in dem vierden iar.

Source Fulltext: Chartularium Sangallense X, Nr. 6019, S. 195-196.