Wir^a) Chůno von gottes gnâden abt dez gotzhus ze sant Gallen, daz ân alles mittel zv^o geho^ert dem stůl ze Rôme, tu^en || kunt vnd veriehent offenlich mit disem brieue allen, die in sehent lesent oder ho^erent lesen, daz fúr v´ns kament ze Appacelle¹ || vff v´nser vesti an dem tag, alz dirre brief geben ist, do wir offenlich ze geriht sassent, diz nachgenemten erberen lút Vrsella || Walther Kaltysens burgers ze sant Gallen elichi wirtinn Hainrich Arnoltz sa^elgen elichi tohter vnd Elzbeth ir elichi swester vnd nament ze fúrsprechen Hainricen Garnleder den schriber o^vch burger ze sant Gallen, der offenot an iro stat vnd von iro baider wegen offenlich vor v´ns an gemainem geriht vnd sprach, daz sv´ mit ainberem willen vnd mit gůter vorbetrahtung nach iro frúnde vnd nach ander erber lút rat den obern hof ze Ainswille vff der egge vnd den nidern hof ze Ainswille, die ainhalb stossent an den hof ze No^echla vnd anderthalb an den Giessen vnd stossent ze der dritten siten an daz Tal vnd ze der vierden siten an Cůnratz gůt von Ainwille ze A^etzzisperg, die von v´ns vnd v´nserm gotzhus iro reht lehen wa^erint, mit hus mit hof mit akkern mit wisen mit wasen mit zwî mit holtz mit veld mit wunn mit waiden mit stegen mit wegen mit stok mit stain mit wasser mit wasserflússen vnd gengen mit allen rehten nútzzen vnd gewonhaiten vnd mit allem dem, so von reht ald von gewonhait darzů vnd darin geho^ert, ez sie genemptz oder vngenemptz gesůchtz oder vngesůchtz wissentz oder vnswissentz, vnd darzů mit sehszehen maltern baider korn sant Galler messes, die sv´ vff die selben ho^ef ze samen verlihen hettint, redlich vnd reht aines iemer werenden sta^eten ewigen ko^vffes verko^vft vnd ze ko^vffenn geben hettint den beschaidnen fro Adelhaiten Cůnrat Ho^ern sa^elgen wilunt burgers ze sant Gallen elichen wirtinnen vnd Johansen Ho^ern ir elichem sun o^vch burger ze sant Gallen baiden gemainlich vnd vnuerschaidenlich vnd iren erben, ob sv´ enwa^erint, vmb sibenzig phunt vnd vmb ahtenthalb phunt phenning gůter vnd gena^emer Costentzzer múnse, der sv´ gantzlich von in gewert wa^erint vnd enphangen hettint vnd an iro offenn nutz bewendet, vnd hettint in o^vch die selben ho^ef vnd gu^eter da fúr vnd in den rehten ze ko^vffenn geben, daz da von noch darab niht gat noch gan sol danne allain der zehent vnd niht anders. Vnd batent v´ns eruarn an ainer vrtail, wie sv´ inen die vorgeschribenen ho^ef vnd gu^eter vertgen vnd zv iren handen bringen so^eltint vnd mo^ehtint, alz reht wa^er vnd daz ez kraft hett vnd haben mo^eht nv vnd o^vch hie nâch. Daz taten wir vnd ward ertailt mit gemainer vrtail, daz die vorgenant Vrsella Kaltysnin ainen vogt nemen so^elt mit dez selben ir êlichen mannes willen an dem ring, wen si wo^elt, vnd daz si der ze drin mâlen vsser dez gerihtes ring fu^eren so^elt vnd si fragen, ob si ez willeklich vnd gern ta^et vnd tůn wo^elt, vnd daz die vorgenant Elzbêth Arnoltin ir anerbornen vogt nemen so^elt vnd daz sv´ daz danne mit iro vnd mit der selben iro vo^egt handen vnd o^vch mit v´nser hant tůn so^eltint vnd daz ez danne also wol kraft vnd maht hetti nach dem rehten. Do nament sv´ baid ze vogt v´ber diz sache mit dez vorgenanten Walther Kaltysens willen iro anerbornen vogt Laurentzzen Arnolt o^vch burger ze sant Gallen, der fůrt die obgenanten Vrsellun ze drin malen vsser dez gerihtes ring vnd fragot si, alz ertailt waz, ob si ez willeklich vnd gern ta^et vnd tůn wo^elt, der sait ze ieklichem mâl bi sinem aide, daz si spra^ech, daz si ez vnbezwungenlich ta^et vnd willeklich vnd gern tůn wo^elt. Vnd gabent o^vch do die vorgenemten Vrsella Kaltysnin vnd Elzbeth Arnoltin ir swester willeklich frilich vnd vnbezwungenlich mit iro vnd mit dez egenemten Lautentzzen Arnoltz iro anerbornen vogtes handen die vorgeschribenen ho^ef vnd gu^eter ze Ainswille mit allen rehten vnd mit aller zv^o geho^erde reht vnd redlich vf an v´nser hant vnd batent v´ns die lihen ze rehtem lehen den vorgenanten fro Adelhaiten Ho^erinen vnd Johansen Ho^ern ir êlichem sun. Daz taten wir durch iro bet vnd lúhent die vorgeschribenen ho^ef den obern hof ze Ainswille vff der egge vnd den nidern hof ze Ainswille mit allen rehten vnd mit aller zv^o geho^erde, alz vor ist beschaiden, vnd lihent sv´ mit vrkúnd diz brieues reht vnd redlich den vorgenemten fro Adelhaiten Ho^erinen vnd Johansen Ho^ern ir elichem sun baiden gemainlich vnd vnuerschaidenlich ze rehtem lehen vnd ze ainer rehten gemainde, vnd verzigent sich o^vch do die vorgenemten Vrsella Kaltysnin vnd Elzbeth Arnoltin ir swester vnd verzihent sich mit disem brieue gantzlich vnd gar fúr sich vnd fúr alle iro erben der vorgeschribenen ho^ef vnd gu^eter mit aller zv^o geho^erde aller aigenschaft aller lehenschaft aller kuntschaft aller gewer lút vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so sv´ oder iro erben an den zv^o den vnd von der vorgeschribenen ho^ef vnd gu^eter wegen ie gehept hant ald hie nach iemer gehaben oder gewinnen mo^ehtint. Die vorgenemten Vrsella Kaltysnin, Walther Kaltysen ir elicher wirt vnd Elzbeth Arnoltin ir swester lobtent o^vch vnuerschaidenlich mit iren trúwen fúr sich vnd alle iro erben, der vorgeschribenen ho^ef vnd gu^eter mit aller zv^o geho^erde vnd dez ko^vffes reht wer ze sinne nach dez landes reht vnd o^vch die vorgenemten fro Adelhaiten Ho^erinen vnd Johansen Ho^ern ir sun vnd iro erben darumb ze versprechenn vnd ze versta^enne an allen stetten gen aller ma^englichem an allen iren schaden, wenn wa vnd wie dik sv´ darumb angesprochen geschadgot oder vf getriben werdent mit dem rehten. Vnd ze vrkúnd der warhait aller der vorgeschribenen dinge vnd vergiht haben wir vorbenemter abt Chůn vnser insigel gehenkt an disen brief. Wir die vorgenemten Walther Kaltysen, Vrsella sin elichi wirtinne, Elzbeth Arnoltin ir swester, Laurentz Arnolt vogt vnd Hainrice Garnleder fúrsprech in der vorgeschribenen sache veriehent ainer gantzzer warhait aller der dinge, so von v´ns an disem brief da vorgeschriben stant, vnd ze merer sicherhait der selben dinge so haben wir o^vch v´nserú insigel gehenkt an disen brief. Der geben ist ze Appacelle an sant Margarthen^b) tag ze mittem ho^vwat in dem jar, do man zalt von Cristus gebúrt drúzehenhundert jar, ahtzig jar vnd darnach in dem fúnften jare.

Source Fulltext: Chartularium Sangallense X, Nr. 6092, S. 279-281.