Allen den, die disen brief ansehent alder ho^erent lesen, kúnde ich Johans von Stettbach¹ vnder richter ze Schafhusen² von mines herren wegen junkher Hainrichs || von Randegge³, der ze disen ziten vo^vgt ze Schafhusen ist, daz fúr mich kament an gericht ze Schafhusen, do ich offenlich ze gerichte sasse, Johans der || Hún genant von Beringen⁴ vnd vro Agnes sin elichi husfro^vwe burger ze Schafhusen, vnd offenetent mit irem fúrsprechen, daz sú ir múli vnd múlistatt, || die ze Wyl⁵ vor der statt gelegen ist, die man nemmet die Klaffent Múli, mit aller zůgeho^erde ze ko^vffenne geben hant recht vnd redelich fúr aigen der erberen fro^vwen vro^vn Elizabethen Berchtoltes des Múllers von Wil elicher husfro^vwen vmb drissig phunt vnd nún phunt gůter phenning Costentzer múntz, der sú von ir gentzlich vnd gar gewert sint an iren gůten vnd redelichen nutz, als sú vor gericht offenlich veriahent, vnd batent in die vorgenanten Johans der Hún vnd vro Agnes sin husfro^vw eruaren an ainer vrtail, wie sú fúr sich vnd ir erben die obgenant múli vnd múlistatt mit aller zůgeho^erde fúr aigen der egenanten vron Elizabethen der Múllerinen vnd ir erben vff geben vnd vertegen so^eltint vnd mo^echtint, also das es nu vnd hie nach kraft hetti vnd recht were. Darvmb wart gefraget vnd ertailt mit besameneter vrtail, das es der vorgenant Johans der Hún mit siner hant tůn so^elt vnd daz sin husfro^vw mit sinem willen vnd vrlob ainen vo^vgt v´ber dis sach nemen so^elt vnd das si es denn mit des vogtes hant tůn so^elt. Do nam si also hierv´ber ze vo^vgt Eberharten den Hv´n burger ze Schafhusen des vorgenanten Johans des Hún sun, vnd fůrt si der ab dem gericht, als im ertailt wart, vnd fra^vget si, ob si es gerne ta^eti. Vnd fůrt si och do wider fúr gericht vnd sait vff sinen aide, daz si im gesait hetti, daz si es willeklich vnd vnbetwungenlich teti vnd och tůn wo^elti. Vnd do gabent vff vnd vertegent o^vch der vorgenant Johans der Hún mit siner hant vnd vro Agnes sin husfro^vw mit des egenanten Eberhartes ir vo^vgtes hant willen vnd gunst, als sú die vrtail lerte, der egenanten vr^vn Elizabethen der Múllerinen die obgenant múli vnd múlistatt mit aller zůgeho^erde fúr aigen vnd entzigent sich der alles gegen ir vnd iren erben vnd alles des rechtes oder anspra^vch, so sú baidú ald ir deweders besunder daran hattent ald iemer gehaben oder gewinnen mo^echtint mit gericht oder a^vne gericht in dehainen weg. Darzů lobtent sú o^vch fúr sich vnd ir erben, dis koffes vnd der egenanten múli vnd múlistatt fúr aigen weren ze sinne nach dem rechten der obgenanten vron Elizabethen der Múllerinen vnd iren erben, vnd beschahent dú vorgeschribenn ding a^ellú vor gericht offenlich, als mit rechter vnd mit besameneter vrtail ertailt wart, daz es alles kraft hetti vnd recht were, vnd darvmb han ich der vorgenant Johans von Stettbach, won ich hiervmb richter was vnd es mir ertailt wart, min insigel gehenkt an disen brief ze ainem vrkúnde diser vorgeschribener ding. Wir die vorgenanten Johans der Hún vnd Agnes sin eliche husfro^vw veriehent, daz wir mit rechter vrtail fúr v´ns vnd v´nser erben alles daz geta^vn vnd vollefu^eret haben, daz von v´ns hie vorgeschriben sta^vt, vnd des ze warem vrkúnde han ich der vorgenant Johans der Hún min insigel och gehenkt an disen brief, vnd ich die egenant Agnes sin husfro^vw binde mich vnd min erben vnder des egenanten Eberhartes mines vo^vgtes insigel, sta^et ze habenn dú vorgeschribenn ding. So vergich och ich der egenant Eberhart, daz die egenant vro Agnes, der vo^vgt ich bin, als vorbeschaiden ist, mit miner hant gůtem willen vnd gunst alles das geta^vn vnd vollefu^eret het, das von ir hie vorgeschriben sta^vt. Vnd dez ze warem vrkúnd han ich min insigel fúr si vnd fúr mich in vo^vgtes wise och gehenkt an disen brief. Der geben wart, do man zalt von gottes gebúrt drúzehenhundert vnd sibentzig ja^vr vnd darnach in dem achtenden ja^vre, an dem nechsten fritag vor sant Katherinen tag.

Source Fulltext: Chartularium Sangallense IX, Nr. 5673, S. 345-346.