Ich Růdolf von Glotan¹ vergih vnd tůn kunt mit vrkúnd dis briefs allen, die in an sehent oder ho^erent lesen, won ich ze disen ziten hie ze || land nit beliben mag, darumb so han ich mit wolbedahtem sinn vnd můt vnd mit gůter vorbetrahtung ellú minú gu^eter vnd zins || vnd och alle min lehenschaft, die ich hie ze land han, minem lieben o^ehaim Eberhart Kofman burger ze Wil² in getruwes hand || enpfolhen mit vollem gewalt, min stat darúber ze halten ze besetzzenn vnd ze entsetzzenn vnd min zins in ze nemen vnd minú lehen ze lihenn vntz an min wider ru^effen. Vnd wie er minú gu^eter besetzzet oder entsetzzet vnd wie och minú lehen mit siner hand vnd vnder sinem insigel oder ân brief verschaff ot versorgot vnd verlihen werdent, daz das als gůt vnd als gantz kraft hat vnd haben sol, als ob ichs selber ta^eti, vnd sol ich och da wider niemer komen noch getůn weder mit worten noch mit werken noch mit ainkainen andren sachen. Vnd dez ze ainer warhait han ich min aigen insigel gehenkt an disen brief. Der geben ist ze Wil des na^ehsten samstags nah dem hailigen tag ze pfingsten in dem jar, do man zalt von gottez gebúrt drúzehenhundert jar, sibentzig jar, darnach in dem fúnften jar.

Source Fulltext: Chartularium Sangallense IX, Nr. 5459, S. 132.