Heinricus^a) dei gratia episcopus Constantiensis¹ universis presentium inspectoribus salutem in eo, qui est omnium vera salus, cum notitia subscriptorum. || Licet cunctos in stadio huius militantis ecclesie currentibus et presertim nobis subiectos in suis piis propositis confovere teneamur, illos tamen, || quos divinis laudibus pre ceteris vigilare conspicimus, ampliori favore nos prosequi debere dignum arbitramur et congruum. Sane cum devotus || frater Johannes dictus de Rútberg² in heremitorio silve olim nuncupate in dem Sa^edel³ nunc vero nominate in dem Tobel⁴ nostre dyocesis de consensu eorum, quibus fundus pertinuit, unam capellam cum suis fratribus ad laudem et honorem dei et gloriosissime virginis matris Marie totiusque celestis exercitus de consensu etiam loci ordinarii ac rectoris parrochialis ecclesie in Ganderswile⁵ dicte nostre dyocesis, in cuius ecclesie parrochia huiusmodi heremitorium existit, construxerit et erexerit ac consacrari procurarit et in eodem heremitorio a secularibus fluctibus segregatus ad modum sanctorum patrum cum suis fratribus sub stricta vita heremitica deo a longis temporibus retroactis adeo vacaverit, quod etiam vita ipsius non paucos ad salubrem hactenus traxerat devotionem, et propterea felicis recordationis quondam Fridericus comes de Tokkenburg⁶, cui fundus dicti heremitorii necnon silve predicte iure dominii pertinuit, eandem silvam necnon curtim et aream dicti heremitorii ac capelle predicte pure propter deum ob remedium sue et progenitorum suorum animarum dicto fratri Johanni eiusque fratribus eorumque successoribus universis donaverit et ab omni servitute et subiectione temporali dictum heremitorium cum eius silva exemerit ac liberum et absolutum reddiderit et deo dedicaverit, prout in litteris⁷ eiusdem quondam Friderici comitis super huiusmodi donatione confectis vidimus plenius contineri, nobisque prefatus frater Johannes cum suis fratribus humiliter supplicavit, ut huiusmodi donationem ac omnia, que per ipsum quondam Fridericum comitem circa ipsum heremitorium facta sunt, auctoritate nostra ordinaria auctorizare approbare et confirmare dignaremur. Nos igitur huiusmodi instant(ibus) supplicationibus ob honorem dei, cuius cultum in nostris temporibus cupimus adaugeri, favorabiliter annuentes donationem prefati quondam Friderici comitis de Tokkenburg dicto heremitorio eiusque capelle factam omnesque libertates eidem heremitorio traditas auctoritate nostra ordinaria auctorizavimus approbavimus et confirmavimus et in nomine domini auctorizamus approbamus et confirmamus presentium per tenorem. Et ut prescripta capella cum dicto suo heremitorio omnesque res ecclesiastice et mundane eidem capelle et heremitorio donate et collate et inantea donande et conferende plena gaudeant libertate, predictam capellam eiusque heremitorium omnesque res ecclesiasticas et mundanas nunc eisdem donatas et collatas et in futurum donandas et conferendas sub omnipotentis dei et gloriosissime virginis matris Marie et sanctorum Johannis Baptiste et Johannis Ewangeliste, in quorum honore ipsa capella est consacrata, atque nostram et successorum nostrorum recepimus protectionem et recipimus per presentes ac universis et singulis tam ecclesiasticis quam secularibus personis presentibus et futuris sub pena excommunicationis, quam in transgressores huiusmodi nostri mandati canonica monitione sex dierum premissa ferimus hiis in scriptis, ne quis dictam capellam et eius heremitorium ac res et bona quecumque ecclesiastica vel mundana nunc ipsis collata et in posterum conferenda invadant seu diripiant aut sibi usurpent vel ipsos fratres dicti heremitorii quomodolibet molestari presumant, sub pena excommunicationis predicta. Insuper etiam quia pro parte ipsorum fratrum dicti heremitorii nobis propositum extitit, quod ipsorum devotio interdum minuetur ex eo, quod sacerdos, qui cum ipsis in dicto heremitorio moratur, sicut ceteri fratres ipsius heremitorii ad querendum elemosinas pro ipsorum vite sustentatione egredi necessitate urigente^b) compellitur, in cuius absentia tam missa quam aliis divinis careant solatiis, nobisque supplicatum, ut ipsis super premissis misericorditer providere dignaremur, idcirco ne fervens ipsorum fratrum devotio ex premissis contingat tepescere, ad laudem et honorem omnipotentis dei et gloriosissime virginis Marie et totius celestis exercitus auctoritate nostra ordinaria ipsis fratribus dicti heremitorii presentibus et futuris de gratia speciali concessimus et indulsimus, ut quilibet sacerdos gratiam sedis apostolice suique officii executionem habens, qui cum ipsis fratribus in dicto heremitorio moram traxerit aut ad ipsos fratres ad dictum heremitorium causa devotionis confluxerit, eisdem fratribus missam et missas legere et celebrare confessionesque ipsorum fratrum audire penitentiam salutarem iniungere ipsisque corpus Christi porrigere valeat, ac concedimus et indulgemus presentium per tenorem. In quorum testimonium sigillum nostrum episcopale duximus presentibus appendendum. Datum et actum Constantie anno domini millesimo trecentesimo septuagesimo quinto, V. kln. iunii, indictione XIII^a.

Source Fulltext: Chartularium Sangallense IX, Nr. 5454, S. 127-128.