Allen^b) den, die disen brief an sehent lesent oder ho^erent lesen, kúnd ich herr Johans der Smid von Wil¹ der elter ain priester || vnd vergih des offenlich mit disem brief fúr mich vnd fúr alle min erben, das ich ansih vnd angesehen vnd bekent han, || daz ich vnd Hainrich der Wanner von Búrren² min vatter sailig dez erwirdigen gotzhus ze sant Gallen gro^ess||lichen genozzen vnd vil nútzlicher nútz in genomen vnd enpfangen habin von dem grôssen hof halbem ze Wil, der v´nser lipding was, vnd darumb daz den erwirdigen fúrsten minen gna^edigen herren abt Cůnen dez gotzhus ze sant Gallen³ vnd daz selb sin gotzhus der selben nútz, so wir von dem selben hof vnd lipding in genomen vnd dauon genôssen habin, in êtlicher mâsse ergetzzet wurdint, so han ich mit friiem willen vnbetwungenlich mit wolbedâhtem sinn vnd můt dem selben abt Cůnen vnd sinem gotzhus min aigen hus hofstatt den garten dur hinder vnd die hofraiti gelegen ze Wil in der Obren Vorstatt⁴ entzwischent Cu^enis Jacobs hus vnd Peters Trůngers ga^ertli mit allen rehten nútzzen vnd gewônhaitten vnd mit aller zůgeho^erd letklich vnd frilich vfgeben vnd mit ains schulthaissen hand ze Wil geuerttgot vnd zů siner vnd sines gotzhus handen vnd wegen brâht, alz ze Wil reht sitt vnd gewônlich waz vnd alz ich ôch daz durch reht wol solte vnd môhte tůn, ân alle geuerd, vnd han mich ôch darúber in des selben abt Cůnen siner nâhkômen vnd och in sines vorgeschriben gotzhus hand wolbedâhteklich fúr mich vnd fúr alle min erben verzigen vnd entwert vnd verzih vnd entwer ôch mit kraft dis briefs an dem vorgeschriben hus hofstatt dem garten vnd hofraiti mit aller zůgeho^erd alles rehtes gaistlichs vnd weltlichs gerichtes aller vordrung vnd ansprach aller fúrzúg vnd vszúg vnd aller der ander sach vnd geuerden, da mit ich oder min erben oder jeman andrer von v´nsren wegen vnd an v´nser statt daz selb hus hofstatt den garten vnd ôch die hofraiti mit aller zůgeho^erd nv^ ald hernach gentzlich oder an dekainem taile kúndint angesprechen ald da mit wir dise gâbe vnd gifte vnd ôch dis sach widerru^effen gewênden ab geriben ald ze niht schaffen ald machen mo^ehtint in^c) dehainen weg vngeuerlich. Vnd dez allez ze ainer besta^eten sicherren wârhait aller diser vorgeschribner ding han ich herr Johans der Smid da vorgenemt min insigel fúr mich vnd fúr alle min erben offenlich gehenkt an disen brief. Der geben ist ze Wil in der statt an dem na^ehsten donstag vor dem hailigen tag ze pfingsten, do man zalt von gottez geburt drúzehenhundert jar, ahtzig jar, darnach in dem dritten jare.

Source Fulltext: Chartularium Sangallense X, Nr. 5952, S. 123-124.