Universis sancte matris ecclesie filiis, || ad quos presentes littere pervenerint, nos miseracione divina Ricardus Naturensis¹, Augustinus Salubriensis², Johannes Armibotensis³, Bertoldus Ciso||polensis⁴, Philippus Lauadensis³, Robertus Dauacensis³, Petrus Swacensis⁵, Thomas Syrensis^a)6, Petrus Calliensis^b)7, Albertinus Surmanensis³, Franciscus Ve||rehensis^c)8, Franciscus Lapsacensis³, Palus Girapetrensis⁹, Cosmas Traphasonensis¹⁰, Andreas Balacensis¹¹, Martinus Texianensis³, Ricardus Bisaciensis¹², Anancius Xanciensis¹³ episcopi salutem in domino sempiternam. Splendor paterni luminis, qui sua mundum ineffabili claritate illuminat, pia vota fidelium de clemencia et eius maiestate sperancium tunc enim precipue benigno favore prosequitur, cum devota ipsorum humilitas sanctorum meritis et precibus adiuvatur. Cupientes igitur, ut ecclesia parrochialis beate Marie in Ganderswil¹⁴ Constanciensis diocesis congruis honoribus frequentetur et a Christi fidelibus iugiter veneretur, omnibus vere penitentibus contritis et confessis, qui ad dictam ecclesiam in singulis sui patroni et beate Marie virginis ac omnibus infrascriptis festivitatibus videlicet nativitatis domini, circumcisionis, epiphanie et per totam quadragesimam, parasceves, pasce, ascensionis, penthecostes, trinitatis et corporis Christi, invencionis et exaltacionis sancte crucis, sancti Michahelis, sanctorum Petri et Pauli apostolorum et omnium aliorum apostolorum, sanctorum Johannis Baptiste et Ewangeliste et omnium aliorum ewangelistarum et quatuor sancte ecclesie doctorum, in festo omnium sanctorum et conmemoracione animarum dicteque ecclesie dedicacionibus sanctorumque Stephani, Laurencii, Georii, Viti, Eustachii innocentum martirum, Martini, Nicolai, Galli, Gregorii confessorum ac sanctorum Vdalrici, Erhardi, Emerani, Antonii, Blasii, Mauricii, Otmari sanctarumque Marie Magdalene, Marthe, Anne, Katherine, Margarethe, Barbare, Vrsule, Dorothee, Ottilie, Lucie, Affre, Elisabeth, Agathe, Agnetis, Cecilie et per octavas festivitatum predictarum octavas habencium singulisque diebus dominicis et sabatis causa devocionis, oracionis aut peregrinacionis accesserint vel qui missis, vesperis, matutinis, predicacionibus aut aliis divinis officiis ibidem interfuerint seu qui corpus Christi vel oleum sacrum, cum portantur ad infirmos, secuti fuerint vel qui in serotina pulsacione campane flexis genibus ter Ave Maria devote dixerint seu qui ad fabricam dicte ecclesie luminaria, ornamenta, libros, calices, aurum, argentum, vestimenta donaverint, legaverint, donari vel legari procuraverint seu quovis alio modo dicte ecclesie manus porrexerint adiutrices, vel qui pro salubri statu domini episcopi presencium confirmatoris vel pro domino . . dicto de Mesenkann¹⁵ ipsius ecclesie rectore harum impetratore necnon omnium parentum, amicorum et benefactorum suorum in purgatorio existencium pie deum oraverint, quandocumque, quocienscumque et ubicumque premissa seu aliquod premissorum devote fecerint, de omnipotentis dei misericordia et beatorum Petri et Pauli apostolorum eius auctoritate confisi singuli nostrum quadraginta dies indulgenciarum de iniunctis eis penitenciis misericorditer in domino relaxamus, dummodo dyocesani voluntas ad id accesserit et consensus. In quorum omnium testimonium presentibus nostra sigilla sunt appensa. Datum Auinione, IIII^a. die mensis aprilis, anno domini millesimo trecentesimo sexagesimo primo, pontificatus sanctissimi in Christo patris et domini nostri domini Innocencii divina providencia pape sexti anno nono.

Source Fulltext: Chartularium Sangallense VII, Nr. 4733, S. 541-542.