Allen den, die disen brief sehent lesent oder ho^erent lesen, kúnd ich Hainrich von Eppenberg¹ vnd vergich des offenlich an disem brief fúr || mich vnd alle min erben vnd nachkomen, das der êrwirdig min gena^ediger herre von gottes gnaden abt Herman abt des^a) || gotzhus ze sant Gallen² alle die zinse, die miner vordern vnd min von miner vorder wegen vss dem hof ze || Nidrenglatt³ von dem vorgeschriben^b) gotzhus ze sant Gallen ain gewert phant wârent, von mir gantzlich vnd gar mit allen rechten erledgot vnd erlo^est hât vmb zwainzig mark silbers vnd vmb vier phunt phenning gůter Costentzer munse, des selben silbers vnd der selben phenning ich och gantzlich gewert bin vnd emphangen han vnd an minen offenbaren nutz bekeret, vnd won die selben vorgeschriben zinse also gantzlich von mir erledgot vnd erlo^est sint, dar umbe enzihe^c) mich mit disem brief fúr mich vnd alle min erben vnd nachkomen aller der recht ansprach vnd vordrung, so ich zů den vorgeschriben zinsen hatte ald haben moht in dehainen weg ald von dehainen sachen, also daz ich noch min erben noch ieman von minen wegen zů den vorgeschriben zinsen von des vorgeschriben phantschatz wegen niemer haben noch gewinnen sont an gaistlichem noch an weltlichem gericht noch ân gericht. Vnd wa^er, daz dehain brief dehainost funden ald gezaigt wurdin, die vmb die vorgeschriben zinse geben wa^erint, dauon ich ald min erben ald ieman von vnsren wegen zů den selben zinsen recht so^eltin ald mo^ehtin han, die brief sont alle vnnútz vnd gantzlich vnkreftig sin vnd dem vorgeschriben gotzhus vnd menlichem von des selben gotzhus wegen vnscha^edlich. Vnd ze ainem waren vrkúnd vnd gantzer sicherhait aller der vorgeschriben dinge vnd gedinge so han ich der vorgenemt Hainrich von Eppenberg min insigel gehenkt an disen brief fúr mich vnd alle min erben vnd nachkomen. Dirre brief wart geben ze sant Gallen an dem na^ehsten mentag vor sant Vitus vnd sant Modestus tag, in dem jar, do man zalt von gottes gebúrt drúzehen hundert jar, fúnfzig jar vnd darnach in dem dritten jar.

Source Fulltext: Chartularium Sangallense VII, Nr. 4301, S. 192-193.