Wir graue Cůnrat von Fúrstenberg¹ vnd fro^v Adelhait geborn von Griessenberg² sin elichi fro^vw veriehen vnd tu^en kunt mit disem brief allen, die in ansehent lesent oder ho^erent lesen, || daz fúr v´ns kamen die fromen V^olrich vnd Hainrich von Lo^enberg³ gebrůder burger ze Costentz vnd offenoten da vnd sprachen, daz sú von ir redlichen not wegen reht vnd redlich verkoft || hettin die vogtye ze dem dorfze Bramshouen⁴ mit allen rehten nútzen vnd gewonhaiten vnd mit aller zůgeho^erd, die von v´ns ir lehen was, vnd hettin ze koffenn geben dem fromen || manne Johansen Kupfersmit genant Wirri burger ze Wil⁵ vnd sinen erben vmb fúnfzig pfunt siben pfunt vnd ain schilling gůter Costenzer múns, vnd wa^erin och der selben pfenning gantzlich von im gewert an den stetten, da sú iren fromen mit geschaffet hettin, vnd gaben v´ns och da mit gůter vorbetrahtung vnd beschaidenhait die selben vogtye mit allen rehten letklich vff an v´nser hand vnd baten v´ns, die selben vogtye mit allen rehten dem selben Johansen Kupfersmit lihen ze rehtem lehen, Daz taten wir durch ir ba^et vnd haben die vorgeschriben vogtye ze Branshouen mit allen rehten nútzen vnd gewonhaiten vnd mit aller zůgeho^erd dem vorgenemten Johansen Kupfersmit reht vnd redlich verlihen vnd lihen im mit disem brief ze rehtem lehen, vnd ist dis alles reht vnd redlich beschehen vnd volfu^ert mit allen den worten vnd werken, so nah gewonhait vnd nâh reht darzů gehorten vnd notdurftig waren vnd als reht sitte vnd gewonlich was. Vnd ze offenem waren vrkúnd vnd sta^eten sicherhait aller diser vorgeschriben ding henken wir die vorgenemten graue Cůnrat von Fúrstenberg vnd frow Adelhait sin elichi fro^vw v´nsri insigel an disen brief. Darnach veriehen wir die vorgenemten V^olrich vnd Hainrich von Lo^enberg gebrůder ain gantz warhait aller diser vorgeschriben ding vnd das alles das war ist, das die erwirdigen v´nser gena^edigen graue Cůnrat von Fúrstenberg vnd fro^v Adelhait sin elichi frow von v´ns veriehen hant an disem brief, vnd ze merer sicherhait der selben ding henken wir och v´nsri insigel an disen brief Der geben ist ze Wartenberg⁶ an dem na^ehsten ma^entag ze inga^entem mertzen in dem jar, do man zalt von gottes gebúrt drúzehenhundert iar, sehzig jar vnd darnach in dem núnden jar.

Source Fulltext: Chartularium Sangallense VIII, Nr. 5165, S. 333-334.