Ich^a) graf Růdolf von Montfort¹ heirr ze Veltkilch² kund vnd vergich offenlich mit disem brieue fúr mich vnd alle min erben || vnd nachkomen, als der wolbeschaiden Ha^enni Amman min burger ze Veltkilch den hof, der gelegen ist ze Bůch³, mit aller || zůgeho^erung vnd mit allem recht fúr sich vnd alle sin erben redlichen vnd recht verkoft vnd ze koffenn geben hat den || erbern lúten Cůntzen Schilîn ab Schútz⁴, Haintzen vnd Johansen sinen sv´nen vnd iren erben, als der koff brief wol bewiset, der darúber geben ist, fúr ain fries lediges vmbekúmbertes aigen gůt, von des selben hofs wegen han ich mich erfarn vnder erbern lúten, das er von minen vordem vnd och von mir lehen gewesen ist vntz her. Nv han ich angesehen vnd erkent die mainigualtigen getruwen vnd nutzlich dienst, die die vorgenemten Schili vnd ir vordem mir vnd minen vordem dik getan vnd erzaigt hant, vnd daz ich sv´ der selben dienst dester fúrderlicher ergetzzen rnug, so han ich mit gůter vorbetrachtung vnd gewissenî vnd och gesunt libs vnd můtes den vorgenemten Cůntzen Schilin, Haintzen vnd Johansen sinen súnen allen drin vnd ieglichem besunder vnder în vnd iren erben dú manschaft vnd dú lehenschaft des selben hofs ledklich vnd och frilich vfgeben ze iren handen vnd den selben hof fúr ain fries lediges vmbekumbertes aigen gůt redlichen vnd recht geben vnd geaigent, daz sú den hof mit allem recht vnd mit allen nútzzen also fúr aigen haben vnd niessen sont, ân geuerd. Vnd darumb verzieh ich mich vnd han mich och verzigen mit disem gegenwúrtigen brieue fúr mich vnd alle min erben vnd nahkomen gen den vorgenemten Schilînen allen vnd gen iren erben aller manschaft aller lehenschaft aller besatzzung aller kuntschaft aller gewer lút vnd brief aller zúgnust aller recht rechtung vordrung vnd ansprach, so ich von manschaft ald von lehenschaft wegen an dem zů dem vnd von des vorgeschriben hofs wegen ie hatt gewan ald hernach iemer gehan oder gewinnen mo^eht in dehain wîs, vnd das ich noch ainkain min erben noch nieman andre von v´nsren wegen noch an v´nser stat die vorgenemten Schill noch ire erben von ainkainer manschaft noch lehenschaft wegen des vorgeschriben hofs nv^ hinnenhin niemer me ansprechen vftriben bekumberron bekrenken noch in ainkain wis noch weg beswa^erren sont weder mit recht noch ân recht noch mit enkainen andren^b). Vnd ist disú vorgeschriben sach volfu^ert vnd volbraht mit allen worten werken geba^erden vnd geta^eten, so nach gewonhait vnd nach recht darzů gehorten vnd ho^eren mochten. Vnd dez ze ainer sta^eten sicherren warhait vnd offem vrkúnd han ich min insigel gehenket an disen brieue. Der geben ist ze Veltkilch in miner stat an dem na^ehsten samstag vor sant Thomas tag in dem jar, do man zalt von gottez gebúrt drúzehenhundert jar, sechzig jar, darnach in dem achtodenjare.

Source Fulltext: Chartularium Sangallense VIII, Nr. 5160, S. 329-330.