Allen^a) den, die disen brief an sehent oder ho^erent lesen, kúnd ich Cůnrat von Múnchwille¹ sesshaft ze Vrowenuelt² vnd vergih des offenlich mit disem brief, daz fúr mich kam || ze Wil³ in der statt an disem húttigen tag, alz dirr brief geben ist, der erber kneht Cůnrat Lupfer von Búrwald⁴ vnd offent vnd veriah da offenlich vor mir vnd || sprach, daz er durch sinen nutz vnd notdúrft verkoft hetti sinen zehenden ze Búrwald, den man nemt des Hillers zehend, der sin lehen von mir waz, vnd hetti geben ze || koffenn ains rehten besta^eten ewigen redlichen vnd vngeuarlichen kofs mit allen rehten nútzzen vnd gewonhaitten vnd mit aller zůgeho^erd dem erbern vnd fromen kneht V^olrich dem Weber von Búrwald, der och da ze gegen stůnd, vnd allen sinen erben vmb vierdhalb pfunt pfenning allez gůter vnd gena^emer Costentzer múns, vnd wa^er och der selben pfenning aller gar vnd gentzlich von im gewert vnd bezalt an den stetten, da ers in sinen redlichen schinbaren offenn gůten nutz geben vnd bewendet hetti. Vnd nach der vergiht do gab mir do der selb Cůnrat Lupfer mit wolbedahtem můt den vorgeschriben zehenden mit allen obgeschriben rehten nútzzen vnd gewonhaitten vnd mit aller zůgeho^erd letklich vnd frilich vf an min hand vnd batt mich ernstlich, in ze lehen lihen dem vorbenempten V^olrich Weber. Do verhort ich darúber sin ernstlich bett vnd han mit wolbedahtem můt den vorgeschriben zehenden mit allen obgedahten rehten nútzzen vnd gewônhaitten vnd mit aller zůgeho^erd verlihen dem vorbenempten V^olrich Weber vnd lihe och redlich vnd reht mit vrkúnd dis briefs ze rehtem lehen. Der vorgenant Cůnrat Lupfer hat och vor mir gelobt fúr sich vnd fúr sin erben, des vorbenempten V^olrichs Webers vnd siner erben des vorgeschriben zehenden mit aller zůgeho^erd vnd och des redlichen kofs reht wer ze sinne nach reht gen maniglichem vff gaistlichem vnd vff weltlichem gericht, wenn wa vnd wie dik si des bedurfent vnd notdúrftig sint, ân alle geuerd. Vnd dez vnd hierúber ze ainer besta^eten warhait aller vorgeschribener ding vnd gedingde han ich Cůnrat von Múnchwille da vorgenant min insigel offenlich gehenkt an disen brief. Der geben ist ze Wil in der stat an sant Agthen tag, do man zalt von gottez gebúrt drúzehenhundert jar, darnach in dem ain vnd ahtzigosten jare.

Source Fulltext: Chartularium Sangallense IX, Nr. 5829, S. 484.