Innocentius episcopus servus servorum dei dilecto filio . . scolastico ecclesie Argentinensis¹ salutem et apostolicam benedictionem. || Ex parte siquidem dilectorum filiorum . . abbatis et conventus monasterii sancti Galli ordinis sancti Be||nedicti Constantiensis diocesis fuit nobis humiliter supplicatum, ut, cum propter guerrarum pericula et dis||cordiam generalem redditus monasterii ipsorum inimicis ecclesie facientibus sint nimium diminuti, ecclesiam Abbatis Celle curam animarum habentem, in qua ius patronatus habent, retinendam in usus proprios ipsis et eidem monasterio concedere curaremus. Nos igitur eorum supplicationibus benignum impercientes assensum auctoritate litterarum nostrarum sibi duximus indulgendum, ut prefatam ecclesiam, si vacat ad presens vel cum eam vacare contigerit, retinere in usus proprios libere valeant, proviso^a) quod eiusdem ecclesie vicario de redditibus ipsius ea portio reservetur, quod exinde sustentari et alia ecclesie prefate onera valeat sustinere. Quocirca discretioni tue per apostolica scripta mandamus, quatinus non permittas dictos abbatem et conventum contra concessionis nostre tenorem super hiis indebite ab aliquibus molestari, molestatores huiusmodi per censuram ecclesiasticam appellatione postposita compescendo. Dat. Perusii, III id. marcii, pontificatus nostri anno decimo.

Source Fulltext: Chartularium Sangallense III, Nr. 1486, S. 366-367.